Урысыем ыпс

Урысые Федерацием и Правительствэ ыгъэшъошэрэ тынэу «Урысыем ыпс» зыфиIорэр къэзылэжьыгъэхэм ар зыщаратыжьыгъэ пчыхьэзэхахьэ П. Чайковскэм ыцIэ зыхьырэ концерт къэгъэлъэгъуапIэу Москва дэтым щыкIуагъ. Адыгэ къашъом икупэу «Синдикэм» ихудожественнэ пащэу Едыдж Викторие тын лъапIэр къызэратыгъэхэм ащыщ.

Тыгъэгъазэм и 4-м Iофтхьабзэр зэхащагъ. 2019-рэ илъэсым изэфэхьысыжьхэмкIэ, Урысыем ишъолъыр 15-мэ ятворческэ купхэм япащэхэу, Iэпэщысэхэм яшIын дэлажьэхэу, орэдыIохэу къэралыгъо шIухьафтыныр къызфа­гъэ­шъошагъэхэр ащ къырагъэблэгъагъэх.

«Лъэпкъ искусствэм ижъуагъохэр» зыфиIорэ концертым хэлэжьэнхэу къыхахыгъэхэм Едыдж Викторие зипэщэ къэшъокIо купэу «Синдикэр» ащыщ, Урысыем икъэшъокIо ансамблэ цIэрыIоу «Березкэмрэ» Пятницкэм ыцIэ зыхьырэ орэдыIо купымрэ зы сценэм адытетыгъ, джащ фэдэу Удмуртием, Белгород хэкум къарыкIыгъэхэми зыкъагъэлъэгъуагъ. «Синдикэм» къышIыгъ ижъырэ адыгэ къашъоу «ЗэфакIор».

Урысые Федерацием культурэмкIэ иминистрэ игуадзэу Николай Овсиенкэм пчыхьэзэхахьэр къызэIуихыгъ, тын лъа­пIэр зыфагъэшъошагъэхэм министрэм ыцIэкIэ къафэгушIуагъ.

Лъэпкъ творчествэм иурыс Къэралыгъо Унэу Москва дэтым ипащэу Тамара Пуртовам Едыдж Викторие иIофшIагъэ къыхигъэщыгъ, осэшI купым ар хэтыгъ.

— Къашъоу анахь осэ ин зыфэпшIынэу зытефэхэрэм ащыщэу лъэпэтетхэр агъэ­федэхэзэ къашIырэ «ЗэфакIор» сэ сшъхьэкIэ къахэсхыгъ. Едыдж Викторие исэнэхьаткIэ IэпэIэсэныгъэ ин хэлъ, ар «Налмэсым» хэтызэ джыри къыгъэлъэгъуагъ, джы егъэджэн IофшIэнри щысэтехыпIэу егъэцакIэ, — къытиIуагъ Тамара Пуртовам.

«Урысыем ыпс» зыфиIорэ тыныр я 17-рэ илъэс хъугъэу зэхащэ, а уахътэм нэбгыри 195-мэ ар афагъэшъошагъ. Адыгеим щыщхэу ар къызэратыгъэр нэбгыритIу — Къулэ Амэрбыйрэ Едыдж Викториерэ.

Къэралыгъо шIухьафтыныр зыщаратыжьыгъэ пчыхьэзэхахьэр зэрэкIуагъэр нахь игъэкIотыгъэу тигъэзет къыхи­утыщт.

МэщлIэкъо Саид.

Москва — Мыекъуапэ.