УпчIэхэр, джэуапхэр

Пыдзэфэ пытэхэр зэрэдащыхэрэм ыуасэ зэрыт тхылъхэм афэгъэхьыгъэ упчIэхэр джы къызнэсыгъэм бэу къытфэкIох. Ахэм джэуапхэр къяттыжьыхэмэ тшIоигъуагъ.

УпчIэ: Къоджэ псэупIэхэм адэсхэм хэкIыр зэрэдащырэм ыпкIэ сомэ 70-рэ къашIыжьыгъагъ. Сыда квитанциехэм со­ми 101-рэ чапыч 34-рэ зы­кIарытхагъэр?

Джэуап: АР-м и ЛIышъхьэ иунашъокIэ къоджэ псэупIэхэм адэсхэм хэкIым ыуасэу атыщтым къыкIегъэчыгъэ (скидка) хъугъэ ыкIи сомэ 70-м къыщыублагъэу сомэ 85-рэ чапыч 67-м къэсыгъ. А къыкIегъэчыгъэр хэушъхьафыкIыгъэу квитанацием итхагъ, «перерасчет» зыфиIорэм ишъулъэгъощт.

Шъутын фаеу къыратхагъэр тэрэзмэ шъор-шъорэуи шъу­уплъэкIун шъулъэкIыщт. Сомэ 70-р нэбгырэ пчъагъэу итхагъэм­кIэ оштэ, ащ къыкIэкIыжьыгъэр мэзэ пчъагъэу зэрэптын фаем фэдизкIэ оштэжьы.

УпчIэ: Пыдзафэхэр зэрэдащыхэрэм ыуасэ тыдэ щыптын плъэкIыщта?

Джэуап: ПАО-у «Сбербанкым» иотделениехэм аштэ, ащ иприложениеу «Сбербанк-онлайнымкIи» птын плъэкIыщт, ООО-у «МадиКом» зыфиIорэм икассэхэм, почтэм иотделениехэм ащаштэщт.

Джащ фэдэу региональнэ операторым иофисхэми ащыптын плъэкIыщт. МыекъуапэкIэ — ар урамэу Пионерскэр, 297-рэ, АдыгэкъалэкIэ — урамэу Советскэр, 2В ыкIи поселкэу ЯблоновскэмкIэ — урамэу Школьная, 10/1. Региональнэ операторым икассирхэми къо­джэ псэупIэхэр къакIухьэхэзэ хэкIыр зэрэдащырэм ыуасэ къаугъои.

УпчIэ: Квитанциер къызахьыкIэ ащ итхагъэр игъом ыкIи икъоу птыгъэу, ау гущыIэу «чIыфэ» итхэгъэныр сыда къызыхэкIырэр?

Джэуап: Игъом шъотымэ гумэкIыгъо щыIэп. Квитанцием итхэгъэн фаем зэхъокIыныгъэ фэхъугъэу, ар игъом региональнэ операторым IэкIэмыхьагъэмэ аущтэу итхэгъэн ылъэкIыщт.

УпчIэ: Илъэсыр къызихьагъэм къыщыублагъэу зыпа­рэкIи квитанциер къамыхьыгъэмэ сыда пшIэн фаер?

Джэуап: ХэкIыр зэрэдащырэм ыуасэ зэрыт тхылъыр зы­парэкIи къызыфамыхьыгъэм паспортыр, псэупIэр ежь зэриунаер ыкIи унэм итхэгъэ нэбгырэ пчъагъэр къэзыушыхьатхэрэ тхылъхэр ыIыгъхэу «ЭкоЦент­рэм» иофисхэм е псэупIэхэр къэзыкIухьэхэрэ менеджерхэм зафигъэзэн фае.

Комиссиер хэмытэу

Пыдзэфэ пытэхэр зэрэIуащыхэрэм ыуасэ «Урысыем и Почтэ» икъутамэхэм цIыфхэм ащатын амал яIэным фэгъэхьыгъэ зэзэгъыныгъэм ООО-у «ЭкоЦентрэр» дыкIэтхагъ. Джы шъхьадж зыдэс псэупIэм почтэм иотделениеу дэтым рихьылIэн ылъэкIыщт, ау ащ пае комиссие ытын ищыкIагъэп. Региональнэ операторым почтэм ифэIо-фашIэхэм апкIэ ежь ытыщт. Комиссиер сомэ 30 зэрэхъурэр.

Джащ фэдэу региональнэ операторым иофисхэм, ПАО-у «Сбербанкым» икъутамэхэм, «Сбербанк-онлайным», ООО-у «МадиКом» зыфиIорэм икассэхэм комиссиер хэмытэу хэкIым идэщын ыуасэ ащыптын плъэ­кIыщт.

Игъом хэкIым идэщын ыуасэ птымэ, чIыфэ зэрэптемылъыщтым имызакъоу, социальнэ IэпыIэгъу къыуатынэуи амал уиIэщт.

ООО-у «ЭкоЦентрэм» икъутамэу АР-м щыIэм ипресс-къулыкъу.