УПСАУНЭУ УФАЕМЭ

ГумкIи, лъымкIи федэ

Ащ фэдэ уасэ реты народнэ медицинэм бысымгуащэхэм шхыныгъо зэфэшъхьафхэр зыхашIыкIырэ баклажаным. А хэтэрыкIым шъоу иIэм къыхэкIыкIэ «синенькэкIэ» цIыфхэр ащ еджэх.

Баклажаным игъо хъугъэмэ къызэрэпшIэщтыр ышъо зызэрэзэблихъурэр ары. Зигъо хъугъэ хэтэрыкIыр къыпымычэу уахътэ зытешIэкIэ, ар нахь фыжьы хъужьэу регъажьэ. Къызыуугъоирэм ыуж «синенькэхэр» мэфи 10-м нахьыбэрэ щыбгъэлъхэ хъущтэп. ЧIыпIэу зыщыпIыгъыщтхэри мэзэхэн фае, нэфынэм ахэр хэлъхэмэ, щэнаут веществоу «соланин» зыфаIорэр ащ хэхъонэу регъажьэ. Ащ псауныгъэм зэрар рихын ылъэкIыщт.

Народнэ медицинэм зэригъэунэфыгъэмкIэ, мы хэтэрыкI лъэпкъыр бгъэфедэнкIэ дэгъу атеросклерозым зыщыуухъумэнымкIэ, ащ лъыр егъэкъабзэ, гуузым епхыгъэу цIыфыр мэпщымэ, шъоущыгъу уз е подагрэ иIэмэ, ишIуагъэ къэкIо, кIэтIыим дэгъоу Iоф регъашIэ. Мыр пщэрыщэ хъухэрэм нахьыбэрэ агъэфедэн фаеу елъытэ народнэ медицинэм. «Нарушение обмена веществ» зыфаIорэм зыщыухъумэгъэнымкIи мы хэтэрыкIыр IэпыIэгъушIоу щыт.

ШЪУФЭСАКЪ! ЩЫНАГЪО! Нэгъум е кIэтIыим егъэ уз (язвэ) иIэмэ, баклажаным уфэсакъын фае, ащ хэшIыкIыгъэ гъомылапхъэхэр бэрэ умыгъэфедэхэмэ нахьышIу.

Мы хэтэрыкI лъэпкъыр бгъэфедэ хъущтэп лъым шъоущыгъоу хэлъыр макIэмэ, гемоглобиныр шапхъэм шIокIэу агъэунэфыгъэмэ, ныбачъэ бэрэ охъумэ.

IэзэкIэ амалэу иIэхэр

Артритыр

Къупшъхьэ зэрытыпIэхэм плъырстыр уз яIэмэ, псы литрэныкъом щайджэмышхым из содэ хэбгъэткIухьанышъ, узырэ чIыпIэм щыпфэщт. Ащ ыкIыIу теплъхьащт зэтеупкIыгъэ баклажан тхьакIыгъэу, гъушъыжьыгъэу нэужым пахъэкIэ гъэушъэбыжьыгъэр («распаренный» зыфаIорэр). Ахэр зэпшIэгъэ чIыпIэм цы шъэбэ пшъэдэлъыр къепщэкIынышъ, сыхьати 3-рэ тебгъэлъыщт. Уахътэр зикIыкIэ баклажаныр тепхыжьынышъ, псы чъыIэтагъэкIэ а зэрытыпIэр птхьакIыжьыщт ыкIи тыгъэгъэзэ дэгъэ тIэкIу ащ щыпфэщт.

Мыщ фэдэ IэзакIэм узыр хигъэжъукIыщтэу еIо народнэ медицинэм.

Атеросклерозыр, жъэжъые етагъэр (нефритыр)

ЗыцIэ къетIогъэ узхэм агъэгумэкIыхэрэм баклажаным хэшIыкIыгъэ гъомылапхъэхэр нахьыбэрэ агъэфедэнхэ фаеу къыхегъэщы народнэ медицинэм.

 Баклажаным къыкIэфыгъэкIэ псыри IэпыIэгъушIу хъущт. Мафэ къэс тIогъогогъо ащ фэдэ псы стэчаным ызыплIанэ уешъомэ, лъыр еукъэбзы, егъэкIэжьы, ар зэрыкIорэ лъынтфэхэр нахь егъэушъэбых. Лъы къабзэр зэрыкIорэ лъынтфэхэм абгъухэр Iужъу, пытэ зыхъухэкIэ ары диагнозэу «атеросклерозыр» загъэуцурэр.

Лъыр мэкIэныр (малокровиер)

Мы хэтэрыкIым лъыр нахьыбэ ышIэу, ыгъэбаеу еIо народнэ медицинэм. Медицинэм пылъ шIэныгъэлэжьхэм зэрагъэунэфыгъэмкIэ, баклажаным гъуаплъэ (медь) бэу хэлъ. Ары лъым хэзыгъахъорэр, нахьыбэ зышIырэр. Ащ пае мы узыр зиIэхэм мафэ къэс зы баклажан ашхымэ, ишIуагъэ къэкIощт.

Цэ лъапсэхэр мэузыхэмэ (пародонтоз уиIэмэ), цэхэр гъожьышъохэмэ

АхэмкIи мы хэтэрыкIыр IэпыIэгъушIу хъун ылъэкIыщт. Народнэ медицинэм къызэриIорэмкIэ, ащ пае баклажаныр бгъэстыщт яжьэ ар мэхъуфэ. Нэужым а яжьэмкIэ мафэм тIогъогогъо пцэхэр плъэкIыхэзэ пшIыщт (IэхъуамбэхэмкIэ).

Баклажаныр ыкIышъо зэрэтелъэу бгъэжъэнышъ, бгъэушъэбыщт. Нэужым ар (бгъэушъэбыгъэр) зэрэхъугъэм фэдиз щыгъу хэптэкъощт ыкIи дэгъоу ахэр зэхэбгъэкIухьащтых. IэхъуамбэхэмкIэ ащ ухэIабэмэ, цэлхэм ащыпфэмэ, цэхэри плъэкIыхэзэ пшIыщт.

ЖАКIЭМЫКЪО Аминэт.