УплъэкIунхэр макIох

Шъугу къэдгъэкIыжьын, мэзаем ыкIэм къыщегъэжьагъэу Мыекъуапэ дэт кIэлэцIыкIу IыгъыпIэу N 22-м чIэс сабыйхэм ыкIи Iоф щызышIэхэрэм кIэтIый уз яIэным ищынагъо щыIэу республикэ инфекционнэ сымэджэщым зэращагъэхэр.

Мыекъуапэ имэрэу Андрей Гетмановым иунашъокIэ мы гумэкIыгъом зыщытегущыIэгъэхэ зэхэсыгъо мы мафэхэм республикэм икъэлэ шъхьаIэ щыкIуагъ. Ащ хэлэжьагъэх Роспотребнадзорым и ГъэIорышIапIэу АР-м щыIэм, АР-м псауныгъэр къэухъумэгъэнымкIэ и Министерствэ ялIыкIохэр, кIэлэцIыкIу IыгъыпIэхэм япащэхэр, нэмыкIхэри.

Непэрэ мафэм ехъулIэу ыпэкIэ зигугъу къэтшIыгъэ кIэлэцIыкIу IыгъыпIэм чIэс сабый 23-рэ, Iоф щызышIэрэ нэбгырэ 23-рэ кIэтIый уз яIэным ищынагъо щыIэу сымэджэщым чIэлъых. Сымаджэхэм япсауныгъэ изытет уигъэрэзэнэу щыт. Медицинэ IэпыIэгъур зэрифэшъуашэу арагъэгъоты. КIэлэцIыкIу IыгъыпIэр мы уахътэм зэфэшIыгъ. ИщыкIэгъэ уплъэкIунхэр ыкIи IофшIэнхэр щырагъэкIокIых.

Зэхэсыгъом къызэрэщыхагъэщыгъэмкIэ, сымаджэхэм гущыIэгъу афэхъугъэхэри е благъэу акIэрытыгъэхэри ауплъэкIух. Инфекцием зимыушъомбгъуным фэшI узым иапэрэ нэшанэхэр къызхэщыгъэхэр сымэджэщым ащэх.

Къэлэ администрацием ипащэ иапэрэ гуадзэ ипшъэрылъхэр зыгъэцэкIэрэ Сергей Стельмах къызэриIуагъэмкIэ, хэушъхьафыкIыгъэ комиссиеу зэхащагъэм кIэлэцIыкIу IыгъыпIэхэм язытет ыуплъэкIущт. Къэлэ администрацием гъэсэныгъэмкIэ икомитет къыхьыгъэ предложением диштэу IофшIакIохэм зэзэгъыныгъэу адашIыгъэхэм зэхъокIыныгъэхэр афашIынхэу агъэнафэ. Ащ къыдыхэлъытагъ гъэсэныгъэм иучреждениехэм Iоф ащызышIэхэу, сабыйхэм ахэтхэм япсауныгъэ изытет зэщыкъуагъэу гу зылъатэкIэ, къыдэмыкIынхэу ыкIи псынкIэу медицинэ IэпыIэгъу зэрагъэгъотынэу. Мыщ фэдэ шIыкIэм ишIуагъэкIэ сымаджэ хъугъэхэр кIэлэцIыкIухэм якIолIэщтхэп ыкIи узыр къапахыным ищынагъо щыIэщтэп.

Роспотребнадзорым и ГъэIорышIапIэу АР-м щыIэм мы Iофыгъор инэплъэгъу ригъэкIырэп. Мы уахътэм Iофхэм язытет зыфэдэм зыщыдгъэгъозэнэу ащ ипащэу Сергей Завгороднем гущыIэгъу тыфэхъугъ. Ащ къызэриIуагъэмкIэ, Роспотребнадзорыр мы лъэныкъомкIэ Iофтхьэбзэ зэфэшъхьафхэм ахэлэжьэным фэхьазыр.

— Планэу тиIэм диштэу тиIофшIэн зэхэтэщэ, — къытфеIуатэ Сергей Завгороднем. — Гухэлъэу щыIэмкIэ, зы кварталым къыкIоцI гъэсэныгъэм иучреждение ыкIи социальнэ объект 22-рэ тыуплъэкIун фае. Гъомылапхъэхэр зэраIыгъхэм, кIэлэцIыкIухэм ягъэшхэн, нэмыкI лъэныкъохэмкIи шапхъэхэр аукъуагъэхэу уплъэкIунхэм къагъэлъэгъуагъ. Планым хэмыт уплъэкIун тшIыным пае прокуратурэм Iизын къытитын фае.

ДжырэкIэ прокуратурэм ащ фэдэ пшъэрылъ Роспотребнадзорым къыфигъэуцугъэп. КIэлэцIыкIу IыгъыпIэу N 22-р зэфэшIыгъ. Дезинфекцие ашIы, нэужым лабораторнэ уплъэкIунхэр щырагъэкIокIыщтых. КIэлэцIыкIу IыгъыпIэр шапхъэхэм зэрадиштэрэр нафэ къызыхъукIэ, ар къызэIуахыжьыщт.

ГЪОНЭЖЬЫКЪО Сэтэнай.