УплъэкIунхэм язэфэхьысыжьхэр

Адыгэ Республикэм и ЛIышъхьэу КъумпIыл Мурат АР-м и УплъэкIу-лъытэкIо палатэ и Тхьаматэу Елена Матвеевам тыгъуасэ зэIукIэгъоу дыриIагъэм 2018-рэ илъэсым мы къулыкъум Iофэу ышIагъэм изэфэхьысыжьхэм, непэ пшъэрылъ шъхьаIэу щытхэм щатегущыIагъэх.

Хабзэ зэрэхъугъэу, илъэсым телъытэгъэ бюджет ахъщэр гъэфедагъэ зэрэхъугъэм епхыгъэхэ уплъэкIунхэм якIэуххэр палатэм зэфехьысыжьых, ащ республикэм ипащэ щегъэгъуа­зэ. БлэкIыгъэ илъэсымкIэ пшъэ­рылъхэр зэшIохыгъэхэ, хэукъоныгъэу къыхагъэщыгъэхэр дэгъэзыжьыгъэхэ зэрэ­хъугъэм АР-м и ЛIышъхьэ къы­кIэупчIагъ.

Елена Матвеевам къызэ­ри­IуагъэмкIэ, бюджет ахъщэр гъэ­­федагъэ зэрэхъугъэр уплъэ­кIугъэным фытегъэпсыхьэгъэ Iоф­тхьэбзи 7 блэкIыгъэ илъэсым зэхащагъ, ащ щыщэу 6-р — республикэм ипащэ ишIоигъоныгъэкIэ. Объект 82-мэ аIэкIэлъ сомэ миллиарди 2,3-рэ хъурэ бюджет ахъщэр ыкIи сомэ миллион 900 хъурэ мылъкур зэрагъэзекIуагъэр ауплъэкIугъ. Сомэ миллион 619,8-м игъэфедэнкIэ хэукъоныгъэхэр къыхагъэщыгъэх. Мыщ ипроцент 77,4-р шэпхъэ-правовой актхэм ягъэцэкIэн, бухгалтерскэ учетымкIэ зэфэхьысыжьхэр тэрэзэу зэрамышIыгъэхэм япхыгъэх. Специалистхэм ясэнэхьат хэшIыкIэу фыряIэр зэрэмыиным, финанс дисциплинэр укъуагъэ зэрэхъугъэм мыхэм афэдэ къэ­гъэлъэгъонхэр къыкIэлъыкIуа­гъэх. Хэукъоныгъэхэу къыха­гъэ­щыгъэхэм ащыщэу сомэ мил­лиони 9,4-р — зищыкIэгъэ лъэ­ныкъом пэIуагъэхьагъэп, со­мэ миллион 75,3-р — шIуагъэ къытэу агъэфедагъэп. Палатэм унашъохэу ышIыгъэхэм ауж сомэ миллиони 9-м ехъур къы­зэкIагъэкIожьыгъ. ЗэкIэмкIи административнэ протоколи 10 зэхагъэуцуагъ, шапхъэхэр зыукъуагъэхэм ащыщхэм тазырхэр атыралъхьагъэх, дисцип­линарнэ пшъэдэкIыжь арагъэ­хьыгъ.

2019-рэ илъэсымкIэ мыщ фэдэ уплъэкIун Iофтхьэбзи 9 зэхащэнэу палатэм егъэнафэ. Непэрэ мафэм ехъулIэу 3-р рагъэкIокIыгъ, бюджет ахъщэр гъэфедагъэ зэрэхъугъэр ауплъэкIугъ.

— Шъолъырым хэхъоны­гъэхэр зэришIыхэрэм дакIоу бюджет ахъщэри илъэс къэс нахьыбэ мэхъу, арышъ, мылъкур шIуагъэ къытэу гъэфедэ­гъэным, пшъэрылъхэр зэри­фэшъуашэу гъэцэкIэгъэнхэм пытагъэ хэлъэу тыкъякIолIэн фае. Хэукъоныгъэхэу щыIэхэр дэгъэзыжьыгъэнхэм, тапэкIэ ахэр къэмыхъунхэм фэIорышIэщтхэ амалхэр зэкIэ палатэм ыгъэфедэнхэм, специалистхэм ясэнэхьат зыщыхагъэхъон алъэкIыщтхэ егъэджэнхэр афызэхэщэгъэнхэм мэхьанэшхо яI. Джащ фэдэу бюджет ахъщэр зэрагъэфедагъэм епхыгъэхэ уплъэкIунхэр нахьыбэ шIыгъэнхэм иIофыгъуи шъунаIэ те-шъудз, — къыIуагъ КъумпIыл Мурат.

ИкIыгъэ илъэсым палатэм иIофшIэн зэрэзэхищагъэм АР-м и ЛIышъхьэ осэшIу фишIыгъ, ащкIэ къулыкъум ипащэ фэ-
рэзагъ.

ТХЬАРКЪОХЪО Адам.