Узыфэсакъыжьыным нахьышIу щыIэп

Гъэмэфэ мэфэ фабэхэм цIыфхэм гуIэтыпIэу къыхахырэр псы Iушъохэм аIусынхэр, псым зыщагъэпскIыныр ары. Мыщ фэдэ чIыпIэхэм непэ цIыфыбэ ащызэрэугъои, ау умышIэрэ псым зыбгъэпскIынэу ухэхьаныр зэрэщынагъор зэ­кIэми икъоу къагурыIорэп.

Ахэм сакъыныгъэ къызэрэзыхамыгъафэрэм къыхэкIэу гумэкIыгъуабэм ахэфэх, псым екIодылIэхэу къыхэкIыхэрэми япчъагъэ макIэп.

АР-м къошъо цIыкIухэмкIэ и къэралыгъо инспекцие иотдел ипащэу ХъутIыжъ Мурат къызэ­риIуагъэмкIэ, 2018-рэ илъэсыр къызихьагъэм къыщыублагъэу псым нэбгырэ 13 ытхьэлагъ, блэ­кIыгъэ илъэсым а пчъагъэр 14 хъущтыгъэ, ахэм сабыищ ахэ­тыгъ. Гъэмэфэ лъэхъаныр пштэмэ, нэбгыри 5 псым ытхьэ­лагъ, гъэрекIо ытхьэлагъэр нэ­бгыри 8 хъущтыгъэ. Амыгъэунэфыгъэхэ чIыпIэхэм цIыфхэм зызэрэщагъэпскIырэм мы тхьамыкIагъохэр къыкIэлъэкIох.

— ПсыгъэпскIыпIэкIэ узыхахьэхэ мыхъущтхэм ар зыте­тхагъэхэ табличкэхэр аIутых нахь мышIэми, цIыфхэм къыра­дзэхэрэп, псым хэхьэх, — еIо инспекцием иIофышIэ. — ЫужкIэ ащ гумэкIыгъохэу къызыди­хьынхэ ылъэкIыщтхэм ягупшысэхэрэп, ежьхэм ашъхьэ къызэрихьэу мэпсэух. Анахьэу ­цIыфыр ешъуагъэ зыхъукIэ нахь къаи-
гъэ мэхъу. Чэфым зэрихьэу ар псым зыхахьэкIэ ыгу фэщэчырэп, ылъакъохэр еубытыхэшъ, къе­дэIужьхэрэп, джары на­хьы­бэрэмкIэ псым ытхьалэхэу къы­­зыкIыхэкIырэр. АщкIэ щысэу къэпхьын плъэкIыщтыр бэ.

ЗызыщыбгъэпскIы мыхъущт чIыпIэхэм ахахьэхэрэм апае хэбзэгъэуцугъэ аштагъэу Iоф ешIэ. Мыщ къыдилъытэхэрэ шапхъэхэр зыукъохэрэм тазыр­хэр атыралъхьэх. Арэу щытми, ащи къыгъэуцухэрэп.

Специалистхэм къызэраIо­рэмкIэ, зызыщыбгъэпскIы хъущт чIыпIэ закъоу Мыекъуапэ дэтыр къэлэ бассейныр ары. Щынэ­гъончъэным мыщ лъэшэу анаIэ щытырагъэты. ЦIыфхэр къэзыгъэнэжьрэ отрядым бассейным мафэ къэс къулыкъур щехьы. Нэбгырищыр лъэгапIэм тетхэу зызыгъэпскIыхэрэм алъэплъэх, зы нэбгырэр къуашъом исэу къекIокIы, ахэм ящыкIэгъэ Iэ­мэ-псымэхэр зэкIэ аIэкIэлъых.

ЦIыфхэр къэзыгъэнэжьырэ отрядым иIофышIэхэм къызэраIуагъэмкIэ, мы гъэмафэм бас­сейным зыпари щитхьэла­гъэп, ау мафэ къэс пIоми ухэмыукъонэу хъугъэ-шIэгъэ тхьамыкIагъохэр къыщэхъух. Анахь цIыкIухэм апае бассейным чIы­пIэ хэхыгъэ иI, ахэм янэ-ятэхэр ямыгъусэхэу псым хагъахьэхэрэп.

Сыд фэдизэу псыр щынэгъон­чъэу щытми, узыфэсакъыжьыным нахьышIу щыIэп. Арышъ, зикъэбар шъумышIэхэрэ псы­гъэпскIыпIэхэм шъуахэмыхьэмэ нахьышIу.
Бассейным къыхиубытэрэ чIы­­пIэр дэгъоу зэтырагъэ­псы­хьагъ. Тыгъэм зезыгъэсты зы­шIоигъохэм апае пшахъо зыIу­тэкъогъэ тыгъэзегъэупIэр агъэ­псыгъ. ЦIыфхэм гуIэтыпIэу загъэпсэфыным пае тетIысхьапIэ­хэр, щыгъынхэр зыщызэбла­хъунхэ алъэкIыщт кабинэхэр агъэуцугъэх. Мыекъопэ къэлэ администрацием иIофышIэхэм къызэраIорэмкIэ, джыри бассейным пэблагъэу кIэлэцIыкIу площадкэ къызэIуахыщт.

ЫпэкIэ бассейным пэгъунэгъоу тренажер Iэмэ-псымэхэр агъэуцугъэх. Пляжнэ спорт лъэпкъ зэфэшъхьафхэм апае площадкэ агъэпсыгъ, илъэс за­у­лэкIэ узэкIэIэбэжьмэ, пляжнэ во­лейболымкIэ Къыблэ федеральнэ шъолъыр мэхьанэ зиIэ зэнэкъокъухэр мыщ щыкIуагъэх.

КIАРЭ Фатим.