Узылъызыщэрэ IофшIагъэх

Кушъу Аслъан журналистикэм щызэлъашIэрэ цIыф. Адыгеим ыкIи Краснодар краим щызэхащэрэ зэнэкъокъухэу журналистхэр зыхэлажьэхэрэм иIофшIагъэхэр анахь дэгъухэу къащыхахых.

2018-рэ илъэсым зэнэкъокъоу «Патриот» зыфиIорэм Аслъан иочеркэу «Полет орлицы над бездной, или Они были первыми» зыфиIорэ очеркым апэрэ чIыпIэр къыщыфагъэшъошагъ. А илъэс дэдэм АР-м и Къэралыгъо Совет — Хасэм парламент IофшIэныр дэгъоу журналистым къызэригъэлъагъорэм ыкIи Къэралыгъо Советыр — Хасэр илъэс 25-рэ зэрэхъурэм ехъулIэу ытхыгъэ очеркэу «Шихан-Гирей Хакурате — яркая звезда революции» зыфиIорэм журналистхэм ятын анахь лъапIэу АР-м и ЛIышъхьэ и Премие къыфагъэшъошагъ. Мы илъэсым Аслъан хэутынымкIэ ыкIи коммуникацие жъугъэмкIэ Фе­деральнэ агентствэм ыкIи Дунэе пресс- клубым зэхащэгъэ зэнэкъокъоу «Патриот России 2019-рэ» зыфиIорэм щытекIуагъ.

Литературэми непэп къызыхэхьагъэр. БлэкIыгъэ лIэшIэгъум ия 80-рэ илъэсхэм прозэ цIыкIоу тапэкIэ Цэй Ибрахьимэ, Къуекъо Налбый зыщылэжьагъэхэм ащ гъэхъагъэхэр щишIыгъэх. Кушъум иапэрэ сборникэу «Гончарный круг» зыфиIорэр 2006-рэ илъэсым, иятIонэрэ тхылъ 2017-м къыдэкIыгъэх. ЯтIонэрэ тхылъэу «Письма в вечность» зыфиIорэм сыкъы­тегущыIэмэ сшIоигъу. НэмыкI образкIэ, кIэнэкIалъэ зыхэлъ къэIотакIэр ыгъэфедэзэ сюжетхэр мыщ щыгъэпсыгъэх. ЫпшъэкIэ зыцIэ къесIогъэ тхэкIо IэпэIасэхэм ятхылъхэм Аслъан иIофшIагъэ агобгъэуцон плъэкIыщт. Ау Кушъум тхэкIо цIэрыIохэм атыритхыкIырэп, ежь щыIэныгъэм еплъыкIэ шъхьаф фыриI, мэкъэ шъхьафи егъэIу. Арышъ, Аслъан икъэлэмыпэ художественнэ произведение къодыеп, узылъызыщэрэ, адыгэ лъэпкъым итарихъ ухэзыщэрэ гъуаз къычIэкIыгъэр.

Ащ фэдэу Аслъан итхылъ гъуазэ зыфэхъугъэ пшъэшъэжъые синэIуас. «Письма в вечность» зыфиIорэ тхы­лъыр ащкIэ апэрэу гъунэм нэсэу ыджыгъэ тхылъэу хъугъэ. Непэ пшъашъэр художественнэ литературэм имызакъоу, илъэпкъ къырыкIуагъэм ыгъэгумэкIырэ цIыфэу щыт. Ар зишIушIагъэр Кушъу Аслъан итхылъ ары. Тхылъым шIэны­гъэм уфещэ, узылъещэ. Heпэ ныбжьыкIэр тхылъым еджэ шIоигъо хъуным мэхьанэшхо иI.

Аслъан творческэ IофшIэным ренэу пылъ — журналистикэми литературэми зэфэдэу ащэлажьэ, IэпэIэсэныгъэкIэ, гупшысэкIэ лъэныкъуитIур зэрэгъэбаижьы. Арышъ, иIофшIакIэ уехъопсэнэу щыт.

Джырэблагъэ романэу «На седом Кавказе» зышъхьэр ыухыгъ, къыхаутынэу Адыгэ тхылъ тедзапIэм ритыгъ.

«Письма в вечность» зыфиIоу Кушъу Аслъан къыгъэлъэгъогъэ тхылъым АР-м и Къэралыгъо премие тефэу сэ къысшIошIы.

Пратэкъо Зубер.
АР-м изаслуженнэ журналист, премиеу «Золотое перо Кубани» зыфиIорэр къыфагъэшъошагъ.