Тэхъутэмыкъуаерэ Тыркуем икъалэрэ язэпхыныгъэ агъэпытэщт

Мы илъэсым имэлылъфэгъу мазэ Адыгеим илIыкIо купэу КъумпIыл Мурат зипэщагъэр Тыркуем щыIагъ.

Джащыгъум мы хэгъэгумрэ Адыгеимрэ ямуниципалитетхэр лъэныкъо пстэумкIи язэдэлэ­жьэныгъэ агъэпытэнэу зэрэзэзэгъыгъагъэхэм диштэу, Тэхъу­тэмыкъое районым щыщ куп шIэхэу Тыркуем икъалэу Инегель кIощт. Мы къалэмрэ Тэхъу­тэмыкъуаерэ бэшIагъэу зэблэгъэныгъэ зэдыряI.

ЛIыкIо купым хэтыщтых къуа­джэхэу Тэхъутэмыкъуаерэ Щын­джыерэ япащэхэр, Адыгэ Рес­публикэм и Къэралыгъо Совет — Хасэм, хабзэм илIыкIо къулыкъухэм ядепутатхэр, адыгэ къашъомкIэ ансамблэу «Адыгэ­хэр» зыфиIорэр.

Муниципальнэ образованиеу «Тэхъутэмыкъое къоджэ псэу­пIэм» иадминистрацие ипащэу Нэужьырэкъо Алый къызэри­IуагъэмкIэ, Тэхъутэмыкъуаерэ Инегельрэ бэшIагъэ ныбджэ­гъуныгъэ зэфыщытыкIэхэр зызэдыряIэхэр. Мы аужырэ илъэ­сищым лIыкIо купхэр бэрэ зэхэхьагъэх.

«Мы илъэсым имэлылъфэгъу мазэ Адыгеим илIыкIо купэу КъумпIыл Мурат зипэщагъэр Тыркуем щыIагъ. Ащ щызэ­дашIыгъэгъэ зэзэгъыныгъэхэм къадыхэлъытагъэу блэгъэныгъэ зыдытиIэ къалэм джыри тыкIо тшIоигъу. ТизэфыщытыкIэхэм ягъэпытэн джащ фэдэу фэIорышIэщт 2019-рэ илъэ­сыр культурэмрэ туризмэмрэ я Илъэсэу Урысыеми, Тыркуеми зэрэщагъэнэфагъэр», — къыхигъэщыгъ Нэужьырэкъо Алый.

Бэдзэогъум и 12-м къыще­гъэжьагъэу и 19-м нэс Адыгеим илIыкIо куп хэтхэр къалэхэу Инегельрэ Бурсэрэ япащэхэм, чIыпIэ Адыгэ Хасэу нэбгырэ мини 2 зыхахьэрэм илIыкIохэм аIукIэщтых. IэкIыб къэралыгъохэм ащыпсэурэ адыгэхэм ягъусэхэу Iофтхьабзэу зэрахьан алъэкIыщтхэм атегущыIэщтых.

Инегель индустриальнэ гупчэшхоу зэрэщытым елъытыгъэу IэкIыб бизнесменхэм зэпхыныгъэу адыряIэр гъэпытэгъэным анаIэ тырагъэтыщт. Адыгеим инвестиционнэ амалэу иIэхэм афэгъэхьыгъэ лъэтегъэуцо ахэм афызэхащэщт.

Творческэ коллективэу «Адыгэ­хэр» зыфиIорэр джащ фэдэу адыгэ джэгумрэ лъэпкъ къашъомкIэ дунэе фестивалэу бэдзэогъум ыгузэгу Инегель щыкIощтымрэ ахэлэжьэщт.

Адыгэ Республикэм и ЛIышъхьэ ипресс-къулыкъу