ТиныбжьыкIэхэм тагъэгушхо

Хэгъэгум икIэлэеджакIохэм я Спартакиадэ 2003 – 2004-рэ илъэсхэм къэхъугъэхэр хэлажьэх. СамбэмкIэ банэхэрэр Ермэлхьаблэ щызэIукIагъэх.Адыгэ Республикэм самбэмкIэ ихэшыпыкIыгъэ командэ ятIонэрэ чIыпIэр зэнэкъокъум къыщыди­хыгъ.

Яонтэгъугъэхэм ялъытыгъэу Къыблэ шъолъырым апэрэ чIыпIэхэр къыщыдэзыхыгъэхэм шъуа­щытэгъэгъуазэ: Кобл Рэмэзан, кг 42-рэ, Батмэн Амир, кг 50, Тыгъужъ ТIахьир, кг 55-рэ, Хьа­къуй Амир, кг 66-рэ. ТибэнакIохэм япащэх тренерхэу Р. Джарымэкъор, Н. Джарымэкъор, А. Мыр­зэр, Д. Хьакурынэр, А. Хьабэ­хъур, А. Гъомлэшкыр.

Типшъашъэхэми тагъэгушIуагъ. Мыгу Миланэ, кг 70-рэ, Екатерина Соловьевам, кг 70-м къехъу, Къыблэм идышъэ медальхэр къахьыгъэх. С. Мерэмыр, Б. Нэ­ныжъыр пшъашъэхэм ятренерых.

Снежана Чувашовам, кг 38-рэ, Бэгъ Суандэ, кг 44-рэ, Гъомлэшк Анзор, кг 46-рэ, ХьакIэко Данэ, кг 47-рэ, Хьакъуй Анзор, кг 60, ТIэшъу СултIан, кг 78-рэ, Къэлэ­къу­тэкъо Азэмат, кг 84-м къехъу. ЗыцIэ къетIуагъэхэм ятIонэрэ чIыпIэхэр афагъэшъошагъэх. Тре­нерхэу М. ХьакIэмызым, А. Чэ­тыжъым, А. Гъомлэшкым, З. Ацу­мыжъым, С. Мэрэтыкъом, Н. Джарымэкъом, Р. Джарымэкъом бэнакIохэр агъасэх.

Мадина Хиталенкэм, кг 41-рэ, ПIатIыкъо Заринэ, кг 60, Кристина Хижняк, кг 65-рэ, я 3-рэ чIыпIэхэр къыдахыгъэх. Тренерхэу М. ХьакIэмызыр, С. Мерэмыр, И. Аксеновыр япащэхэу самбэм зыфагъасэ.

— Адыгеим ихэшыпыкIыгъэ командэ ятIонэрэ чIыпIэр къыфагъэшъошагъ, Краснодар краир тапэ ишъыгъ, — къытиIуагъ рес­пуб­ликэм самбэмкIэ испорт еджа­пIэ ипащэу, спортымкIэ дунэе класс зиIэ мастерэу Делэкъо Адамэ. – Ростов хэкум ящэнэрэ чIыпIэр къыдихыгъ. Яонтэгъугъэ­хэм ялъытыгъэу апэрэ чIыпIэхэр къэзыхьыгъэхэр Урысыем икIэух Спартакиадэу бэдзэогъу мазэм Чебоксары щыкIощтым хэлэжьэщтых.

Къыблэм ихэшыпыкIыгъэ командэ бэнэкIо 20 хагъэхьагъ — пшъэшъи 10-рэ кIэли 10-рэ. Адыгэ Республикэм щапIугъэхэ кIэли 4-рэ пшъэшъи 2-рэ Чебоксары зэрэкIощтхэм тегъэгушIо. СамбэмкIэ Адыгеим иеджапIэ хэхъоныгъэхэр ешIых. Зыныбжь имыкъугъэхэм ясэнаущыгъэ къы­зэIуахызэ, непэ лъапсэу ашIырэр спортышхом зэрэщыпытэщтым, республикэм ибыракъ спорты­шхом лъагэу зэрэщаIэтыщтым тицыхьэ телъ.

Сурэтым итхэр: Адыгэ Респуб­ликэм ихэшыпыкIыгъэ командэу Ермэлхьаблэ щыбэнагъэр.

ЕМТIЫЛЪ Нурбый.