ТекIоныгъэр къыдахыгъ

Адыгэ Республикэм гъэсэныгъэмрэ шIэныгъэм­рэ­кIэ и Министерствэрэ Мыекъопэ къэралыгъо технологическэ университетымрэ кIэщакIо фэхъухи, кIэлэеджакIохэм язэнэкъокъоу «Воплоти свою мечту» зыфиIорэр Мыекъуапэ щызэхащагъ.

IMG-20160422-WA0000Зэнэкъокъур 2012-рэ илъэсым къыщегъэжьагъэу республикэм щырагъэкIокIы. А уахътэм къыкIоцI я 8 — 11-рэ классхэм ащеджэхэу, республикэм ипсэупIэ 30-мэ къа­-
ры­кIыгъэ кIэлэеджэкIо 600-м ыкIи кIэлэегъэджи 100-м ехъум социальнэ проектированиемкIэ яшIэныгъэхэм ­ахагъэхъуагъ. Партнерхэр япроект къыхащэнхэу, ресурс къэкIуапIэхэр къы­зы­фагъэфедэнхэу ыкIи яIофшIэн кIэухэу фэхъухэрэмкIэ пшъэдэкIыжь ахьын алъэкIынэу кIэлэеджакIохэм загъэсагъ.

Зэнэкъокъур едзыгъо зэфэ­шъхьафхэмкIэ зэтеутыгъагъ: «Предпринимательство», «Добро­­вольчество», «Медиа», нэмыкI­хэри. Мы проектхэмкIэ еджа­пIэхэм якомандэ 12 фэдизэу баллхэр нахьыбэу къэзыхьыгъэ­хэр текIоныгъэм фэбэнагъэх.

Едзыгъоу «Медиам» ипроек­тэу «Будущее за нами» зы­фи­IорэмкIэ текIоныгъэр къыдахыгъ Фэдз гурыт еджапIэу N 11-м икIэлэеджакIохэм. Ахэм якураторыр КIэрэф Марыет Нурбый ыпхъур ары. «Предпри­нимательство» зыфиIорэ едзы­гъомкIэ апэрэ чIыпIэр къа­хьыгъ кураторэу ГошIэ Саидэ Аслъан ыпхъум икIэлэеджакIохэм.

— Чъэпыогъум къыщегъэ­жьагъэу республикэ проектэу «Воплоти свою мечту» зыфи­Iорэм тыхэлэжьагъ, — еIо Ма­рыет. — ТикIэлэеджакIохэм Iофтхьабзэм ашIогъэшIэгъонэу яшъыпкъэу зыфагъэхьазырыгъ ыкIи зэнэкъокъум чанэу зы­къыщагъэлъэгъуагъ. Ащ тыхэлэжьэным фэшI типроект къыдыхэлъытагъэу план зэхэдгъэ­уцуагъ ыкIи Iофыгъо зэфэ­шъхьафхэм тахэлэжьагъ. Ахэм ащыщ кIэлэ­еджакIохэм агу ­рихьырэ сэнэ­хьатыр зэрагъэ­гъотыным фэшI IэпыIэгъу афэ­хъугъэныр. Ащ къы­дыхэлъы­та­гъэу журналист сэнэхьатым ишъэфхэм защыдгъэгъуазэ, ащ щылажьэхэрэм нэIуасэ зафэ­тшIы тшIоигъоу апэ республи­кэ гъэзетэу «Адыгэ макъэм» тыщыIагъ. Редактор шъхьаIэм игуадзэу ыкIи пшъэ­дэ­кIыжь зыхьырэ секретарэу, тхакIоу Хъурмэ Хъусенэ дахэу къы­зэ­рэтпэгъокIыгъэр лъэшэу тигуапэ хъугъэ.

Гъэзетым тарихъ гъогоу къы­кIугъэм кIэкIэу кIэлэеджакIохэр апэ щигъэгъозагъэх Хъусенэ. Илъэс бэкIаекIэ узэкIэIэ­бэжьмэ мыщ Iоф щызышIэгъэ тхэкIо цIэрыIохэм, инепэрэ журналистхэм ацIэхэр къыриIохэзэ, гъэзетым гъэпсыкIэу иIэр, ащ икъыдэгъэкIын пылъ Iофы­гъохэр къыIотагъэх. Анахьэу кIэ­лэцIыкIухэм ашIогъэшIэ­гъо­ныгъэр зэо илъэсхэми зэпыу имыIэу гъэзетыр къызэ­рэда­гъэ­кIыщтыгъэр ары. Адыгэ лъэп­къыр ыпэкIэ лъыкIотэным пае уиныдэлъфыбзэкIэ угущы­Iэным мэхьанэшхо зэриIэр Хъу­сенэ кIигъэтхъызэ, нахь игъэкIоты­гъэу бзэм Iоф зэрэдэтшIэн фаер, тыбзэ зыщыдгъэгъупшэ зэрэмыхъущтыр, бзэр щэIэфэ лъэпкъыри зэрэщыIэщтыр къы­хигъэщыгъ. Нэужым адыгабзэкIэ статья цIыкIухэр кIэлэеджа­кIо­хэм къатхымэ ягуапэу ахэр къызэрэхаутыщтхэр къыIуагъ.

DSC_0648

Ащ ыуж Фэдз къикIыгъэ кIэ­лэеджэкIо купыр Адыгэ телерадиокомпанием кIуагъэ. Ащ къащыпэгъокIыгъ ыкIи дахэу къадекIокIыгъ Адыгэ радиом  ипащэу ХьакIэмызэ Сусаннэ. Марыет къызэриIуа­гъэмкIэ, Сусаннэ радиом имызакъоу, телевидением иотдел пэпчъ кIэлэеджакIохэр чIищэ­хэзэ, IофшIэнэу агъэцакIэрэр зыфэдэм щигъэгъозагъэх. КIэ­лэеджакIохэм яупчIэхэм игъэ­кIотыгъэ джэуапхэр ащ къаритыжьыгъэх. Гъэзетыр къызы­фигъэфедэзэ Марыет кIэлэ­еджакIохэм ацIэкIэ Сусаннэ рэ­зэныгъэ гущыIэхэр пегъохых.

— Зэнэкъокъум тыхэлэжьэ­нымкIэ IэпыIэгъу къытфэхъу­гъэх Фэдз гурыт еджапIэм идиректорэу АфэшIэгъо ­Мурадинэ, къоджэ псэупIэм ипащэу Лъэснакъ Рэмэзанэ, — еIо КIэрэф Марыет. — Ахэм лъэшэу тафэраз. КIэлэцIыкIухэм шIэны-
гъэ куу зэрагъэгъотыным, агу рихьырэ сэнэхьатыр къыхахыным фэшI мыхэм лъэшэу яшIуа­гъэ къытагъэкIыгъ. Джащ фэдэу зэнэкъокъур зэхэзыщагъэ­хэм «тхьашъуегъэпсэу» ятэIо. Мыщ фэдэ Iофтхьабзэхэм яшIо­гъэшхо къызэрэкIорэм щэч хэлъэп. ТапэкIи гъэхъагъэхэр тшIыхэзэ ыпэкIэ тызэрэлъы­кIотэщтым тыпылъыщт.

КIарэ Фатим.