ТекIоныгъэм сыда къыкIэлъыкIощтыр?

«Зэкъошныгъ» Мыекъуапэ — «Академия» Ростовна-Дону — 1:0.

ШэкIогъум и 12-м Адыгэ республикэ стадионым щызэдешIагъэх.

Зезыщагъэхэр: И. Иванов — Санкт-Петербург, В. Дорошенко — Краснодар, Т. Тибилов — Ардон.

«Зэкъошныгъ»: Марикода, Негода (Подъячев, 66), Къадый, Невидимый, Ахмедханов, Джыгун (Дыхъу, 90), Датхъужъ, Къэжар, Къонэ, Iащэ (Делэкъу, 84), Осмоловский (Кадимов, 46).

Къэлапчъэм Iэгуаор дэзыдзагъэр: Ахмедханов — 73. Къэжарым пенальтир дидзагъэп — 79.

ЕшIэгъум иапэрэ кIэлъэныкъо «Академиер» нахь дэгъоу ешIагъ. Тикъэлапчъэ Iэгуаор къыдадзэнэу хьакIэхэм амалышIухэр яIагъэх, къэлэпчъэпкъым Iэгуаор къыгъэлъэтэжьэуи уахътэ къыхэкIыгъ. ЯтIонэрэ такъикъ 45-м къыкIоцI «Зэкъошныгъэр» нахь шъуамбгъоу зэрешIэрэм ишIуагъэкIэ гъэхъагъэ ышIыгъ.

Датхъужъ Адамэ тазырыр ыгъэцакIэзэ, метрэ 18 фэдизкIэ зыпэчыжьэ къэлапчъэм зыдаом, къэлэпчъэIутэу С. Будком дахэу зидзи, Iэгуаом кIуапIэ ритыгъэп. Къэжарэ Назир пчэгум къикIи, метрэ 20-м къыщымыкIэу зыпэчыжьэ къэлапчъэм лъэшэу дэуагъ. Iэгуаор чэрэгъузэ хъагъэм ифэщтэу къытщыхъугъ, ау С. Будком икIэрыкIэу иIэпэIэсэныгъэ къыгъэлъэгъуагъ. Къэлэпчъэ бгыкъум Iэгуаор зыщычIэфэщт нэгъэупIэпIэгъум къызэкIидзэжьыгъ.

А. Iащэр, А. Къонэр, А. Датхъужъыр апэкIэ илъыхэу зэп зэрэтлъэгъугъэхэр, ау хъагъэм Iэгуаор радзэныр къадэхъущтыгъэп. Р. Ахмедхановыр джабгъу лъэныкъомкIэ ухъумакIохэм къащыпхырыкIи, С. Будкор ыгъэплъэхъугъ. Благъэу зэкIугъэ къэлапчъэм Iэгуаор дидзагъ — 1:0.

Пчъагъэм командэхэр емызэгъыхэу зэнэкъокъур лъагъэкIотагъ. А. Датхъужъыр, Н. Къэжарэр, нэмыкIхэри зыхэлэжьэгъэхэ пычыгъом уеплъынкIэ гъэшIэгъоныгъэ. «Академием» иухъумакIохэм шапхъэхэр аукъохи, Iэгуаор тиешIакIохэм аIэкIахыгъ. Судьяу И. Ивановыр емыхъырэхъышэу ешIакIохэм къяушъыигъ, пенальтир ыгъэунэфыгъ. Къэжарэ Назир илыягъэу гумэкIыгъэу къэлъэгъуагъ, Iэгуаом лъэш дэдэу еуагъэп. С. Будком иджабгъу лъэныкъокIэ зидзи, лъхъанчэу быбырэ Iэгуаор къызэкIидзэжьыгъ. ЗэIукIэгъур зыщаухыщт уахътэм «Зэкъошныгъэм», «Академием» яешIакIохэр гуIагъэх, пчъагъэм зэхъокIыныгъэ фашIы ашIоигъуагъ. ТикъэлэпчъэIутэу В. Марикодэ, ухъумакIоу А. Невидимэр, нэмыкIхэри цыхьэшIэгъоу ешIагъэх. «Зэкъошныгъэм» хэтхэу Дж. Къадыим, А. Iащэм, А. Къонэм судьям шапхъэхэр зэраукъохэрэм фэшI къафигъэпыти, тамыгъэ гъожьхэр къаригъэлъэгъугъэх. Ащ пае тиешIакIохэм ягуетыныгъэ къырагъэIыхыгъэп.

Пресс-зэIукIэр

«Академием» итренерэу О. Вдовченковым зэрилъытэрэмкIэ, хьакIэхэр дэгъоу ешIагъэх, текIоныгъэм пэблэгъагъэх. Командэм хэтхэр ныбжьыкIэх, сэнаущыгъэ ахэлъ, неущрэ мафэу яIэр нахьышIу хъущт.

— «Зэкъошныгъэм» итренер шъхьаIэу Д. Поповыр иIэнатIэ IукIыжьыгъ. Тэтэр Нурбый тренер шъхьаIэм ипшъэрылъхэр егъэцакIэх, — къытиIуагъ клубым ипащэу Аулъэ Рэщыдэ. — Мы илъэсым «Зэкъошныгъэм» зы ешIэгъу къыфэнагъэр. Командэр нахьышIоу зэрешIэщтым фэбэнэщт.

ШэкIогъум и 19-м «Зэкъошныгъэр» Краснодар щыIукIэщт чIыпIэ командэу «Кубань-2-м».

КIэуххэр

«Спартак» Н — «Чайка» — 0:0, «Черноморец» — «Афыпс» — 1:3, «Ангушт» — «Биолог» — 1:1, «Мэщыкъу» — «Армавир» — 0:1, СКА — «Динамо» — 4:1, «Спартак» Вл — «Легион» — 0:1.

ЧIыпIэхэр

  1. «Афыпс» — 47
  2. «Армавир» — 45
  3. «Краснодар-2» — 35
  4. «Черноморец» — 30
  5. «Чайка» — 30
  6. «Легион» — 28
  7. «Биолог» — 27
  8. СКА — 27
  9. «Спартак» Н — 25
  10. «Зэкъошныгъ» — 23
  11. «Академия» — 22
  12. «Ангушт» — 20
  13. «Мэщыкъу» — 16
  14. «Анжи-2» — 15
  15. «Спартак» Вл — 15
  16. «Кубань-2» — 6
  17. «Динамо» — 6.

Сурэтхэм арытхэр: Аулъэ Рэщыд, Олег Вдовченкэр; «Зэкъошныгъэр» «Академием» дешIэ.

ЕМТIЫЛЪ Нурбый