«Сымэджэ» гъэшIэгъон зэрагъэгъотыгъ

Мыекъопэ къэралыгъо технологическэ университетым апшъэрэ  медицинэ гъэсэныгъэ щызэзыгъэгъотырэ студентхэм апае аужырэ шапхъэхэм адиштэрэ робот къыщэфыгъ.

image (1)Ащ сомэ миллиони 10 ыуас. Студентхэм шIэныгъэу аIэкIэлъхэр практикэм щаушэтыным роботыр фэгъэзэгъэщт.

Роботыр цIыфым фэдэкъабзэу шIыгъэ. Ащ жьы къыщэн, ынэхэр ыгъэупIэпIэнхэ, пскэн елъэкIы. ГущыIэ заулэ къыIонэуи ешIэ. Анахьыбэрэ сымаджэхэм къыхагъэщырэ гущыIэхэу «мэузы», «жьы згъотырэп», «чъыIэ», нэмыкIхэми ар ащыгъуаз. Джащ фэдэу роботыр гъын елъэкIы. Ащ пае мы машинэм ыкIоцI хэушъхьафыкIыгъэу псырэ лъым фэдэ псышъорэ итых. Ахэр зыщищыкIэгъэ уахътэм «сымаджэм» ыкIоцI къызэрикIыщтхэри хэтых. ХэушъхьафыкIыгъэ программэу иIэм ишIуагъэкIэ, ащ ыныбжьыр, бзылъфыгъэщтмэ е хъулъфыгъэщтмэ тебгъэуцон плъэкIыщт.

Роботым ыпкъышъол изытет фэгъэхьыгъэ къэбарыр wi-fi-кIэ компьютерым къытыредзэ. Врач сэнэхьатым феджэрэ студентым ежь-ежьырэу «сымаджэм» илажьэр къыгурыIон, ищыкIэгъэ медицинэ IэпыIэгъур ригъэгъотын фае. Нэужым студентыр тэрэзэу зекIуагъэмэ компьютерым къыгъэлъэгъощт. Зызщагъэсэрэ классымрэ апшъэрэ гъэсэныгъэр зэзыгъэгъотырэ ныбжьыкIэхэм зыщяплъыхэрэмрэ азыфагу гъунджэ зыхэлъ дэпкъкIэ зэпыутыгъ. Ащ ишIуагъэкIэ кIэлэегъаджэхэмрэ студентхэмрэ яIофшIэгъу «сымаджэм» зэрэдэзекIорэр алъэгъун алъэкIыщт.

Мыекъопэ къэралыгъо технологическэ университетым иIэ хъугъэ роботым ишIуагъэкIэ студентхэм шIэныгъэу зэрагъэгъотыгъэхэр къагъэлъэгъонхэ алъэкIыщт.

ГЪОНЭЖЬЫКЪО Сэтэнай.