Спорт Унэшхом щэкIо

Я ХХ-рэ лIэшIэгъум Урысыем дзюдомкIэ итренер анахь дэгъоу, СССР-м изаслуженнэ тренерэу Кобл Якъубэ фэгъэхьыгъэ шIэжь зэнэкъокъур тыгъуасэ Мыекъуапэ къыщызэIуахыгъ. Непэ зэIукIэгъухэр аухыщтых.

Спорт Унэшхоу Кобл Якъубэ ыцIэ зыхьырэм дзюдомкIэ зэнэ­къокъур щэкIо. Воронеж, Москва хэкухэм, Санкт-Петербург, Башкортостан, Къалмыкъым, Къэбэртэе-Бэлъкъарым, Къэ­рэщэе-Щэрджэсым, Дагъыстан. Ингушетием, Ставрополь ыкIи Краснодар крайхэм, Ростов, Волгоград, Астрахань хэкухэм, Севастополь, Адыгеим, нэмыкIхэм ябэнакIохэр зэIукIагъэх.

СпортымкIэ дунэе класс зиIэ мастерхэр, спортымкIэ мастерхэр, Урысыем изэнэкъокъухэм дышъэ, тыжьын медальхэр къащыдэзыхыгъэхэу ШъэоцIыкIу Рустам, Акбар Бейсагуровыр, Муслим Баркалаевыр, Мэлыщэ Ахьмэд, Тулпарэ Айдэмыр, фэшъхьафхэри алырэгъум щэбанэх.

ШъэоцIыкIу Рустам, Мэлыщэ Ахьмэд яапэрэ зэIукIэгъухэр дахэу къахьыгъэх. Краснодар краим къикIыгъэхэм медальхэр къыдахын ямурадэу яIэпэIэсэныгъэ къагъэлъагъо. Темыр Кавказым илIыкIохэр, фэшъхьаф спорт­сменхэр текIоныгъэр къыдэзыхын зылъэкIыщтхэм ащыщых.

Спортым щыцIэрыIохэу Емыж Арамбый, Рудольф Бабоян, Тулпарэ Мыхьамэт, КIуае Хьазрэт, Игорь Вержбицкэм, Хъот Юныс, Беданыкъо Рэмэзан, Къадыр Аслъан, Беданыкъо Байзэт, нэмыкIхэу гущыIэгъу тызыфэхъугъэ­хэм Кобл Якъубэ фэгъэхьыгъэ яхэнэрэ зэнэкъокъум мэхьэнэ ин раты. БэнэкIуи 166-рэ апэрэ чIыпIэхэм афэбанэ.

— Кобл Якъубэ дэгъоу тшIэщтыгъэ, Iоф дэтшIагъ, — къаIуатэ Краснодар краим къикIыгъэу Георгий Тутберидзерэ республикэм испорт Унэшхоу «Ошъутенэм» ипащэу Джарымэкъо Юсыфрэ. — Зэнэкъокъум ныбжьыкIэхэр, спортышхом гъэхъагъэ щызышIыгъэхэр щытэлъэгъух. Кобл Якъубэ ыгъэсагъэхэм тахаплъэшъ, тэгушхо.

Георгий Тутберидзе ионтэгъугъэ елъытыгъэу Владимир Невзоровым ебэнэу къызэрэхэкIыщтыгъэр шIукIэ ыгу къегъэкIыжьы. Ишъхьэгъусэу Ольгэ зэнэкъо­къум игуапэу еплъыгъ.

Тренер ныбжьыкIэу Хьакурынэ Дамир зэгъэпшэнхэр ышIыхэзэ, дзюдом зэхъокIыныгъэу фэхъухэ­рэм къатегущыIэ. Кобл Якъубэ ишIуагъэкIэ Адыгеир спортышхом нахь зэрэщызэлъашIагъэм егъэгушхо.

ТекIоныгъэр къыдэзыхыхэрэм афагъэшъошэщт кубокхэр дахэх. Кобл Якъубэ исурэтышхоу бэнапIэм щытлъэгъугъэм теплъызэ, псэ зыпытым фэдгъэдагъ. Тренер цIэрыIор ынэгу ихыгъэу къытэплъы. Ыгъэсагъэхэм лъытэныгъэ фашIы, щыIэныгъэм лъэужэу къыщигъэнагъэм тэ тырэкIо.

Сурэтхэм арытхэр: Георгий Тутберидзе, ащ ишъхьэгъусэу Ольгэ, Джарымэкъо Юсыф зэнэкъокъум еплъых; ШъэоцIыкIу Рустам текIоныгъэм фэбанэ.