Социальнэ лъэныкъом нахьыбэу инвестициехэр къыхалъхьащтых

Адыгэ Республикэм иминистрэхэм я Кабинетрэ АНО-у «Агентство инвестиций в социальную сферу» зыфиIорэмрэ зэдэлэжьэнхэу зэзэгъыгъэх. Петербург щыкIорэ дунэе экономическэ форумым къыдыхэлъытагъэу ащ фэгъэхьыгъэ зэзэгъыныгъэм Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Муратрэ АНО-м игъэцэкIэкIо директорэу Илья Ковалевымрэ зэдыкIэтхагъэх.

Зэзэгъыныгъэм къызэрэщыдэлъытагъэу Агентствэр ягъусэу социальнэ инфраструктурэм игъэкIэжьынкIэ, социальнэ лъэныкъом инвестициехэр къыхэлъхьэгъэнхэмкIэ ыкIи Урысые Федерацием и Президент ижъоныгъокIэ унашъохэм ягъэцэкIэнкIэ Адыгеим Iофтхьабзэхэр щызэрахьащтых.

Илья Ковалевым къызэриIуагъэмкIэ, Агентствэм шъолъырхэм ясоциальнэ лъэныкъо инвестицие проектхэр щыпхырещых. А проектым къыдыхэлъытагъэу IэпыIэгъу псынкIэ языгъэгъотырэ машинэхэр, гурыт еджапIэхэм яавтобусхэр афызэблахъущтых, футбол комплексхэр агъэпсыщтых, медицинэ пкъыгъохэр гупчэмкIэ аIэкIагъэхьащтых, ЖКХ-м иIофшIэн нахьыбэу шIуагъэ къегъэтыгъэным дэлэжьэщтых.

«Республикэм ихабзэ икъулыкъухэм яIофшIэн анахьэу зытегъэпсыхьагъэр цIыфхэм ящыIэкIэ-псэукIэ зыкъегъэIэтыгъэныр ары. Непэ республикэм щыпхыращырэ къэралыгъо программэхэм азыныкъо нахьыбэр социальнэ лъэныкъом лъэIэсых. Адыгеим нахьышIоу щыпсэунхэм ыкIи Iоф щашIэным тэри ткIуачIэ етхьылIэщт. Агентствэм Iофэу дэтшIэщтыр а лъэныкъохэр ары зытегъэпсыхьэгъэщтыр», — къыIуагъ КъумпIыл Мурат.

Агентствэм игъэIорышIэн фэгъэзэгъэ къулыкъухэр щэу зэтеутыгъ: уплъэкIунхэм афэгъэзэгъэ советыр, бизнес-советыр, регион советыр. Аужырэм Урысые Федерацием ишъолъыр 57-мэ япащэхэр хэхьэх ыкIи Агентствэм ипроектхэр егъэзекIох. Адыгэ Республикэм илIыкIоу, Адыгеим и Премьер-министрэ ипшъэрылъхэр зыгъэцакIэу Наталья Широковар регион советым хэхьэ.