Сомэ миллион 58-м ехъу ытыгъугъ

Илъэс 30 зыныбжь предпринимателым ылъэныкъокIэ Мыекъопэ къэлэ хьыкумым уголовнэ Iоф къызэIуихыгъ.

УФ-м и Уголовнэ кодекс къызэригъэнафэу, гъэпцIагъэ зы­хэлъ бзэджэшIагъэ зэрэзэрихьагъэм, иIэнатIэ къызфигъэфеди зыгорэм имылъку зэритыгъугъэм къыхэкIэу хъулъфыгъэр агъэмысэ.

Хьыкумым зэригъэунэфыгъэмкIэ, 2015-рэ илъэсым, жъоныгъуакIэм къыщегъэжьагъэу Мыекъуапэ щыпсэурэ предпринимателым юридическэ лъапсэ зиIэ цIыфым имылъку къышIуитыгъун мурад иIэу гъэпцIагъэ зыхэлъ зэзэгъыныгъэ дишIи, сомэ миллион 58-м ехъу предприятием зэрар ригъэшIыгъ.

Къэралыгъо гъэпщынакIом унашъоу ышIыгъэм хьыкумым дыригъэштагъ. Лажьэ зиIэр следствием зэхэфын IофхэмкIэ IэпыIэгъу зэрэфэхъурэр, ежьым нэмыкIэу гъэпцIагъэ зыхэлъ бзэджэшIагъэм хэщэгъэ пащэхэм якъыхэгъэщынкIэ иIахьышIу зэраригъэкIырэр, зэрарыр къызэрипщыныжьыгъэр къыдалъыти, бзэджашIэм илъэси 3 хьапс тыралъхьагъ.