Санкт-Петербург щыбэнэщтых

Къыблэ шъолъырым самбэмкIэ изэнэкъокъу Ермэлхьаблэ щыкIуагъ. Илъэс 15 – 16 зыныбжь кIалэхэр, пшъашъэхэр алырэгъум щыбэнагъэх.

Адыгэ Республикэм ихэшыпыкIыгъэ командэ хагъэунэфыкIырэ чIыпIэ 16 къыдихыгъ. Дышъэр бэнэкIуи 4-мэ къахьыгъ. Кобл Рэмэзан, кг 42-рэ, Бэгъ Суандэ, кг 44-рэ, Гъомлэшк Анзор, кг 46-рэ, Тыгъужъ ТIахьир, кг 55-рэ. Н. Джарымэкъом, Р. Джарымэкъом, А. Чэтыжъым, А. Гъомлэшкым, Д. Хьакурынэм, А. Хьабэхъум тиныбжьыкIэхэр самбэм фагъасэх.

ХьакIэко Данэ, кг 44-рэ, Екатерина Соловьевар, кг 70-м ехъу, ДыдыкI Айтэч, кг 72-рэ, Архипов Самир, кг 84-рэ, ятIонэрэ чIыпIэхэр къахьыгъэх. Тренерхэу З. Ацумы­жъыр, Б. Нэныжъыр, Хь. ГуIэтыжьыр, Е. Демченкэр бэнакIохэм япащэх.

Мэлгощ Адамэ, Тэкъэщэ Заур, Нащ Расул, Хьакъуй Анзор, УдыкIэко Бислъан, Мыгу Миланэ, Артем Якушевым, Мыгу Инвер ящэнэрэ чIыпIэхэр къафагъэ­шъошагъэх.
— ТиныбжьыкIэхэм тагъэгугъэ, — къеIуатэ Адыгэ Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адамэ. — Ясэнаущыгъэ къызэIухыгъэным, якъу­лайныгъэ хагъэхъоным афэшI тренерхэр бэнакIохэм алъэплъэх.

Ермэлхьаблэ апэрэ чIыпIэхэр къыщыдэзыхыгъэхэр Къыблэ шъо­лъырым ихэшыпыкIыгъэ командэ аштагъэх. Дунэе зэIукIэгъоу «ТекIоныгъ» зыфиIоу Санкт-Петербург жъоныгъуакIэм и 9 – 12-м щыкIощтым хэлэжьэнхэу загъэхьазыры.
Сурэтым итхэр: Адыгэ Республикэм ихэшыпыкIыгъэ командэ хэтхэу Ермэлхьаблэ щыбэ­нагъэ­хэр, тренерхэр.