Сабыйхэр щыгушIукIыщтых гупсэфыщтыгъ

Краснодар иунэхэм ащыщ горэм ищагу мы­шъэу Афанасий мазэрэ гъучI зэхэгъэжъэгъэ клеткэм исэу зыщэпсэум ыуж ащ икъэбар цIыф­хэм за­шIагъэр. Бзылъфыгъэ горэм Iус къы­фихьызэ ар ыгъашхэщтыгъ.Ау мышъэр арэущтэу псэу зэпытын ылъэкIыщтыгъэп, мэзым хэптIупщыхьагъэкIи цIыф­хэм ясэгъэ псэушъхьэр хэсы­шъущтыгъэп. Икъэбар зытетыр студенткэ горэм инстаграмым къызырегъахьэр ары мышъэм фэгумэкIыхэу зырагъэжьэгъагъэр. Ар зыдащэщтыр ыкIи зы­щыпсэущтыр зэхафыфэкIэ Iусхэр къыращэфынхэу Краснодар имэрие ахъщэ къариты­гъагъ.

Джар ишIыкIэу псэушъхьэхэр зыщаIыгъырэ зоопаркэу Хьаджыкъо щыIэм ар къащэнэу хъугъэ, джарэущтэу мышъитIоу ащ дэсым ящэнэрэр къахэхъуагъ. Врачхэр мышъэм еплъыгъэх, ипсауныгъэ изытет зэрагъэшIагъ, тхылъэу пылъхэри ауплъэ­кIугъэх. Афанасий Iасэ, цIыфхэм зэрясагъэр къыхэщы.

Мышъэр псаоу плъэгъуныр, благъэу укIэрытыныр хэткIи гъэшIэгъоны. Анахьэу псэушъхьэ­хэм ащыгушIукIыхэрэр сабыйхэр ары. Ахэм джы псэушъхьищыри зэдалъэгъун алъэкIыщт. Ежь мышъэхэри хьакIэ цIыкIухэу IэшIу-IушIухэмкIэ зыгъэгу­шIохэрэм къяжэщтых.