Сабыйхэр нахьыбэу къафэхъунхэм кIагъэгушIух

НКО-у «Къуаджэу Хьакурынэхьаблэ дэсхэм хэхъоныгъэ ашIыным фэIорышIэрэ Фондыр» унэгъо ныбжьыкIэхэм IэпыIэгъу ягъэгъотыгъэным, къуаджэм сабыйхэр нахьыбэу къыдэхъонхэм атегъэпсыхьэгъэ Iофтхьэбзэ гъэшIэгъоным кIэщакIо фэхъугъ.

Унагъом апэрэ сабый къызихъокIэ, кIэлэцIыкIум ищыкIэгъэщт хьапщыпхэр зыдэлъ пхъэ къэмланышхо ны-ты ныбжьыкIэхэм аратызэ ашIыщт.

Къоджэ псэупIэм ипащэу Аулъэ Рэщыдэ къызэриIотагъэмкIэ, сомэ мини 10,5-рэ зырыз зыосэ апэрэ къэмланхэр къащэфыгъахэх. Мыгъэ сабыйхэр къызэрыхъогъэ унэгъуищмэ мы охътэ благъэм ахэр аратыщтых.

— Апэрэ мазэм сабыим ищыкIэгъэщт хьап-щыпхэр зэкIэ ащ фэдэ къэмланым дэлъ. Пхъэм хэшIыкIыгъэ къэмланыр пIэкIор папкIэуи агъэфедэн алъэкIыщт, — хигъэунэфыкIыгъ Аулъэ Рэщыдэ.

Ащ къызэриIуагъэмкIэ, кIэлэцIыкIухэр къуаджэм къыдахъохэ къэс ащ фэдэ къэмланхэр къащэфынхэу рахъухьагъ. ГущыIэм пае, къуаджэм дэс унэгъо 13 цIыфышъхьэ къахэхъоным ежэ.

Аулъэ Рэщыдэ къызэриIуагъэмкIэ, къуаджэу Хьакурынэхьаблэ дэсхэм хэхъоныгъэ ашIыным фэIорышIэрэ Фондыр зызэхащагъэр илъэситф хъугъэ. А уахътэм къыкIоцI шIушIэ Iофтхьэбзэ заулэ зэрахьагъ: IэрышI футбол ешIэпIэ цIыкIу агъэпсыгъ, кIэлэцIыкIу къэшъокIо ансамблэм мылъкукIэ IэпыIэгъу фэхъух.