ПшъэрылъыкIэхэр агъэнэфагъэх

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэ­кIэрэ КъумпIыл Мурат Адыгэкъалэ ипащэу Хьатэгъу Налбый къалэу Мыекъуапэ правительствэм и Унэу дэтым зэIукIэ­гъу щыдыриIагъ.

2016-рэ илъэсэу икIы­гъэм ыкIи мы илъэсым иапэ­рэ мэзищ муниципальнэ образованием со­циаль­нэ-экономикэ хэ­хъо­ныгъэу ышIыгъэм икIэ­ух­хэм афэ­гъэхьыгъэу Адыгэ­къалэ ипащэ республикэм иIэ­шъхьэтет къыфи­Iотагъ.

Илъэсэу икIыгъэм экономикэ кризисым ифэ­мэ-бжьымэ экономикэм илъэныкъо пстэуми къатырихьагъэ нахь мышIэми, бюджет пшъэрылъхэр зэкIэ муниципальнэ образованием щагъэцэ­кIа­гъэх, гъэсэныгъэм, медицинэм, культурэм алъэ­ныкъокIэ икъоу фэIо-фа­шIэхэр зэшIуахыгъэх, чIы­пIэхэр нахь зэтырагъэ­псы­хьагъэх. Илъэсым къы­кIоцI хэбзэIахь ыкIи мыхэбзэIахь хахъохэу бюджетым къихьан фаехэр проценти 101,8-кIэ гъэцэкIагъэ хъугъэх, 2015-рэ илъэсым елъытыгъэмэ, процент 13,5-кIэ нахьыб. Унэгъо ныбжьы­кIэ­хэм зычIэсыщтхэ унэхэр ягъэгъотыгъэнхэм ипрограмми мыдэеу гъэцэкIагъэ мэхъу, унэгъуи 10-мэ псэупIэхэмкIэ Iэпы­Iэгъу афэхъугъэх.

КъалэмкIэ анахь мэхьанэ зэратыхэрэм ащыщ еджапIэм джыри мыкIорэ кIэлэцIыкIухэм ягъэсэн. КIэлэцIыкIу Iыгъы­пIэхэм илъэсрэ ныкъорэ зыныбжьхэм къащегъэ­жьагъэу чIыпIэ ащара­гъэгъотыгъ, ахэм ащэрэ сабыйхэм ащыщэу нэ­бгырэ 211-мэ процент 50-м нэсэу фэгъэкIо­тэ­ны­гъэ яI, 54-мэ IыгъыпкIэ аIахырэп. Гъогу кар­тэкIэ заджэхэрэм тегъэ­псыхьагъэу Урысые Федерацием и Президентэу В. В. Путиным ижъоны­гъо­кIэ унашъохэр зэкIэ гъэцэкIагъэ мэхъух.

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зы­гъэцакIэрэм Адыгэкъалэ ипащэрэ иадминистра­циерэ Iофэу ашIагъэм уигъэрэзэнэу ылъытагъ, тапэкIи хэхъоныгъэ къалэм ышIынымкIэ лъэны­къохэр къыгъэнэфагъэх, предпринимательствэ цIы­кIум IэпыIэгъу етыгъэным, унэе хъызмэт­шIа­пIэхэм хэхъоныгъэ ягъэ­шIыгъэным апшъэрэ мэхьанэ яIэу ылъытагъ.

КъумпIыл Мурат къы­зэрэхигъэщыгъэмкIэ, ­Адыгэкъалэ IэпыIэгъу еты­гъэным епхыгъэ Iофтхьа­бзэхэр республикэм ипащэхэм лъагъэкIотэщтых. ГущыIэм пае, гъогухэм ягъэцэкIэжьын мылъку тедзэ къыфыхэгъэ­кIы­гъэным иамал хэплъэнэу ащ къыгъэгугъагъэх.

А мылъкур шIуагъэ къытэу, шэпхъэ гъэнэфа­гъэхэм адиштэу гъэфедэгъэн фае. Къалэм епэсыгъэ теплъэ имыIэ хъу­щтэп. АщкIэ икIыгъэ илъэ­сым шIукIае зэшIохыгъэ хъугъэ, джыри а Iоф­шIэ­ныр лъыгъэкIотэгъэн, Iоф­тхьабзэхэр итхъухьэхэ зы­хъукIэ, цIыфхэм яеплъы­кIэ къыдэтлъытэн фае, сыда пIомэ псынкIэу гъэцэкIэжьыгъэн фэе чIыпIэхэр щыIэх, гъогухэм язытет бэкIэ елъытыгъ гъогурыкIоным ищынэгъончъагъи, — къыIуагъ КъумпIыл Мурат.

Адыгэ Республикэм и ЛIышъхьэ
ипресс-къулыкъу

Сурэтхэр А. Гусевым ты­рихыгъэх.