Пшъэрылъхэр гъэцэкIагъэ хъущтых

Лъэпкъ проектэу «Автомобиль гъогухэр щынэгъончъэнхэр ыкIи шэпхъэшIухэм адиштэнхэр» зыфиIорэр Адыгеим щы­гъэцэкIагъэ зэрэхъурэм ащ фэгъэзэгъэ IофшIэкIо купым изэхэсыгъоу тыгъуасэ щыIагъэм щытегущыIагъэх. Адыгэ Рес­публикэм и ЛIышъхьэу КъумпIыл Мурат ипшъэрылъкIэ Iофтхьабзэр зэрищагъ республикэм ивице-премьерэу Сапый Вячеслав.

Шъугу къэдгъэкIыжьын, мы программэр 2024-рэ илъэсым нэс телъытагъ. Непэрэ мафэм ехъулIэу ащ хэлажьэхэрэр Мые­къуапэрэ къэлэ гъэпсыкIэ зиIэ псэупIэу Яблоновскэмрэ.

Сапый Вячеслав къызэри­IуагъэмкIэ, 2019 — 2024-рэ илъэсхэм мы проектым игъэцэкIэн шъолъырым сомэ миллиарди 3,3-м ехъу щыпэIуагъэ­хьащт. Ащ щыщэу сомэ миллиарди 2-м ехъур — федеральнэ гупчэм, сомэ миллиард 1,2-м ехъур — республикэ бюджетым къатIупщых. Щынэгъончъэу ыкIи шэпхъэшIухэм адиштэхэу гъогухэр гъэпсыгъэнхэмкIэ илъэс къэс республикэр къэгъэлъэ­гъон гъэнэфагъэхэм акIэхьан фае. ГущыIэм пае, хъугъэ-шIагъэхэр нахьыбэу къызыщыхъухэрэ щы­нэгъо чIыпIэхэм япчъагъэ ­илъэс къэс нахь макIэ шIыгъэныр пшъэрылъ шъхьаI. Илъэсэу тыз­хэтым а пчъагъэр проценти 7-кIэ нахь макIэ ашIын, 2024-рэ илъэсым ехъулIэу процент 50-кIэ къырагъэIыхын фае. Мы уахътэм ехъулIэу шъо­лъыр ыкIи чIыпIэ мэхьанэ зиIэхэ гъогухэм ягъэцэкIэжьынкIэ, ахэм ящыкIэгъэ тамыгъэхэр атегъэуцогъэнхэмкIэ, нэмыкI лъэныкъохэмкIи гухэлъхэу щы­Iэхэр зэшIохыгъэнхэ фае.

Мы илъэсымкIэ проектым игъэцэкIэн республикэм ипсэо­лъэ 62-рэ къыдыхэлъытагъ. Ахэм ащыщэу непэрэ мафэм ехъулIэу 61-р зэтырагъэпсы­хьагъ, адрэри шIэхэу аухыщт. Джащ фэдэу мылъкоу къаIэ­кIэхьагъэр шIуагъэ къытэу зэра­гъэфедагъэм ишIуагъэкIэ эконо­мие ашIын алъэкIыгъ. Къызэты­рагъэнэгъэ ахъщэмкIэ Мые­къуапэ иурамэу Шэуджэным ыцIэ зыхьырэм гъэцэкIэжьын тедзэхэр рашIылIагъэх. 2019-рэ илъэсым мы проектым игъэ­цэ­кIэн сомэ миллион 463,3-рэ пэIуагъэхьанэу щыт.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ игуадзэу Лафы­шъэ Рэмэзанэ, Мыекъуапэрэ къэлэ гъэпсыкIэ зиIэ псэупIэу Яблоновскэмрэ яадминистра­циехэм ялIыкIохэр нэужым къэгущыIагъэх, проектыр гъэцэ­кIагъэ зэрэхъурэм изэфэхьысыжьхэр къашIыгъэх, тапэкIэ анахьэу анаIэ зытырагъэтыщт лъэныкъохэр къагъэнэфагъэх. КъызэраIуагъэмкIэ, мы илъэсым къыдыхэлъытэгъэ Iоф­тхьа­бзэхэр зэшIохыгъэхэ хъущтых, шэкIогъум и 1-м ехъулIэу зэкIэ объектхэр атыщтых.

Мы лъэпкъ проектым игъэцэкIэн Адыгеим мэхьанэшхо щыраты, ащ бэкIэ щэгугъых. Ар зэшIохыгъэ зэрэхъурэм лъэплъэ Адыгеим и ЛIышъхьэ.

— Шъолъырым тапэкIи хэ­хъоныгъэ ышIынымкIэ, цIыфхэм ящынэгъончъагъэ къэухъумэ­гъэ­нымкIэ гъогухэм язытет зы­фэ­дэм мэхьанэшхо иI. Ар къыдэт­лъытэзэ IофшIэныр зэхэтщэщт, амалышIухэр къэзытырэ про­ектым игъэцэкIэнкIэ итхъухьагъэр щыIэныгъэм щыпхырыт­щыным тыпылъыщт, — еIо Къум­пIыл Мурат.
2020-рэ илъэсым проектым къыдыхэлъытэгъэ Iофтхьа­бзэхэм ягъэцэкIэн сомэ миллион 475,7-рэ республикэм щыпэ­Iуагъэхьащт. Ащ къыхэкIыкIэ илъэсэу тызхэтым шэкIогъум и 25-м ехъулIэу федеральнэ гупчэм зэзэгъыныгъэхэр да­шIынхэ фае.

ТХЬАРКЪОХЪО Адам.