Пчъагъэр бащэба?

 «Зэкъошныгъ» Мыекъуапэ — «Динамо» Ставрополь — 3:3.

Гъэтхапэм и 10-м Адыгэ республикэ стадионым щызэдешIагъэх.

Зезыщагъэхэр: А. Зубов — Азов, А. ДышъэкI — Налщык, В. Лацвиев — Шахты.

«Зэкъошныгъ»: Гиголаев, Ахмедханов, Къэжар, Шаюнов, Датхъужъ (Березов, 46), Ещенко, Дыхъу (Юрченко, 46), Къонэ, Мамонов, Iащэ (Делэкъу, 64), Крылов (Кадимов, 77).

Къэлапчъэм Iэгуаор дэзыдзагъэхэр: Магомедов — 2, Iащэ — 11, Гараев — 26, икъэлапчъэ дидзэжьыгъ, Маркосов — 55, Делэкъу — 69, Сердюков — 89. Маркосовым пенальтир дидзагъэп — 43.

2017 — 2018-рэ илъэс ешIэгъум хахьэхэрэ ешIэгъухэм ападзэжьыгъ. «Зэкъошныгъэм» зэхъокIыныгъэхэр фэхъугъэх. Адыгэ Республикэм изаслуженнэ тренерэу Ешыгоо Сэфэрбый тикомандэ итренер шъхьаIэу агъэнэфагъ. ЕшIэкIо заулэ кIэу аштагъ.

ЗэIукIэгъур аублэгъэ къодыеу «Динамэр» ыпэкIэ къилъи, В. Магомедовыр ошIэ-дэмышIэу лъэшэу тикъэлапчъэ къызыдэом, Iэгуаор Д. Гиголаевым шъхьарыбыбыкIи, хъагъэм щычэрэгъугъ — 0:1. А. Iащэм ухъумакIохэр ыпашъхьэ щытхэу къэлапчъэм дауи, зэфэдэу пчъагъэр хъугъэ — 1:1. «Динамэм» иухъумакIо хэукъоныгъэ ышIи, икъэлапчъэ Iэгуаор дидзэжьыгъ — 2:1. А. Къэжарэр М. Маркосовым ебэнызэ шапхъэхэр ыукъуагъэх. Пенальтир М. Маркосовым дэгъоу ыгъэцэкIагъ. Къэлапчъэм ар лъэшэу дэуагъ, ау Д. Гиголаевым зидзи, лъхъанчэу быбырэ Iэгуаор къызэкIидзэжьыгъ. М. Маркосовым бэ тыримыгъашIэу тикъэлапчъэ Iэгуаор къыдидзагъ — 2:2. А. Къонэм игъом ыкIи дахэу ыпэкIэ ытыгъэ Iэгуаом А. Делэкъор лъычъи, хъагъэм ридзагъ — 3:2. ЕшIэгъур зыщаухыщт уахътэм С. Сердюковым тикъэлапчъэ Iэгуаор шъхьэкIэ къыдидзагъ — 3:3. ТиухъумакIохэр нэгъэупIэпIэгъум щызэгурыIуагъэхэп.

Пресс-зэIукIэр

Командэхэм ятренер шъхьаIэхэу С. Ешыгуаомрэ Л. Ивановымрэ къызэраIуагъэмкIэ, нахьышIоу зэрешIэщтхэм пылъыщтых.

Сурэтым итхэр: «Зэкъошныгъэр» «Динамэм» дешIэ, А. Iащэр ыпэкIэ илъыгъ.

ЕМТIЫЛЪ Нурбый.