Псыхъо къаргъор чъакъорэп

Адыгэмэ я Мольерэу алъытэрэ Мамый Ерэджыбэ джырэ уахътэ къытхэтыгъэмэ, илъэс 90-рэ зэрэхъущтыгъэр игъэкIотыгъэу тиреспубликэ щыхагъэунэфыкIыгъ. Драматургыр къызыщыхъугъэ къуаджэу Щынджые щыкIогъэ  зэхахьэр хэлэжьагъэхэм къагъэбаигъ.

dsc_0008Пчыхьэ рэхьат. Культурэм и Унэшхоу мыгъэ Щынджые къыщы­зэIуахыгъэм Адыгэ Республикэм и Лъэпкъ театрэу Цэй Ибрахьи­мэ ыцIэ зыхьырэм апэрэу «Псэлъы­хъохэр» къыщигъэлъэгъощтых. Зэхахьэр рамыгъажьэзэ артистхэу Устэкъо Мыхъутар, Зыхьэ Заурбый, Кушъу Светланэ, Кукэнэ Муратэ, Бэгъ Алкъэс гущыIэгъу тафэхъугъ. Пэрэныкъо Чатибэ тхьэпэ фыжьэу  ыIыгъхэр зэрегъафэх, зэрэгумэкIырэр къы­хэщы.

— Кукэнэ Мурати, сэри Тэхъу­тэмыкъуае тыщыщ, — къеIуатэ Урысыем изаслуженнэ артистэу, Адыгеим инароднэ артистэу, медалэу «Адыгеим и Щытхъузехьэр» къызыфагъэшъошагъэу Пэрэныкъо Чатибэ. — Щынджы­ехэм тырягъунэгъу, чылэм дэсхэр  тэшIэх, тафэгушIон тимурад…

Къафэзэщыгъэх

— 1967-рэ илъэсым Адыгэ театрэр Щынджые къэкIуагъэу спектаклэм сеплъыгъагъ, — къеIуатэ IофшIэным иветеранэу Трахъо Вячеслав. — Тиартист­хэм тафэзэщыгъ. АдыгабзэкIэ къа­шIырэ къэгъэлъэгъонхэм тяплъы тшIоигъу.

Талъэкъо Батырбый, Мамый Шыхьам, ЛIэхъусэжъ Хъызыр, Талъэкъо Тыркубый, нэмыкIхэм ягупшысэхэр театрэм фэгъэхьы­гъагъэх. Тиартистхэм якъэгъэлъэ­гъонхэр нахьыбэрэ алъэгъунхэм къыкIэлъэIугъэх.

Тхылъхэр, сурэтхэр

Культурэм и Унэшхо тхылъхэм, сурэтхэм якъэгъэлъэгъон дахэу щагъэпсыгъ. Тэхъутэмыкъое районым итхылъеджэпIэ гупчэ ипащэу С. ШэхэлIыр, Щынджые культурэмкIэ и Унэшхо ипащэу С. Мэзыужьэкъор, Тэхъутэмы­къое районым культурэмкIэ игъэ­IорышIапIэ ипащэу З. КIэлэ­быир къэгъэлъэгъоным къыте­гущыIагъэх. Мамый Ерэджыбэ ипьесэхэр зы­дэт тхылъхэр, ищы­Iэныгъэ гъогу фэгъэхьыгъэ къэбархэр, тарихъ сурэтхэр цIыфхэм ашIогъэ­шIэгъоныгъэх. Е. Мамыим исурэтышхо уеплъы зыхъукIэ, къыб­дэ­гущыIэщтым фэдэу уежэ.

dsc_0828«Псэ зыпытыр псыхъо къаргъом фэд» зыфиIорэ тхылъ къэ­гъэлъэгъоныр Лъэпкъ театрэу И. Цэим ыцIэ зыхьырэм ехьылIэгъэ къэбархэм къагъэбаигъ.

Къуаджэм игурыт еджапIэ икIэлэегъаджэхэр артистхэм къа­кIэупчIагъэх. ЯщыIакIэ фэгъэхьы­гъэ тхыгъэхэр нахьыбэрэ гъэзе­тым къыщыхэтыутынхэу къытэ­лъэIугъэх.

Зэхахьэм  ипэубл

Гуманитар ушэтынхэмкIэ Адыгэ республикэ институтэу Т. КIэра­щэм ыцIэкIэ щытым иIофышIэхэу Шъхьэлэхъо Дарико, Шэуджэн Тэмарэ, ЖакIэмыкъо Заримэ, ШэкIо Мирэ, Агъыржьэнэкъо Симхъанэ, Мамый Руслъан, фэшъхьафхэри юбилей зэхахьэм хэлэжьагъэх.

dsc_0044ШIэныгъэлэжьэу, тхакIоу Мамый Руслъан зэ­IукIэгъум псалъэ къыщишIыгъ. «Гъогу пхэндж», «Дэхэбаринэ ихьа­кIэщ», «Псэлъы­хъо­хэр», урысыб­зэкIэ ытхыгъэ пье­­­сэхэу Москва, фэшъхьафхэм аща­гъэ­уцу­гъэхэр жъы зэрэ­мы­хъу­хэрэр къыIотагъ.

— Ерэджыбэ иIоф­шIагъэ зэфэсхьысыжьзэ, гукIэ нахь пэбла­гъэ сэ­хъу. ТиIахьыл бла­­гъэу щымытми, зы унагъо тыща­пIугъэу, сэри Щын­джые сыщыщэу къысщыхъоу уахътэ къысэкIу, — къы­Iуагъ Мамый Рус­лъан.

dsc_0859Адыгэ Республикэм и Лъэпкъ театрэу И. Цэим ыцIэ зыхьырэм ихудожественнэ пащэу Шъхьэлэхъо Светланэ зыкIэт­хэ­жьыгъэ тхыгъэм Урысы­ем изаслуженнэ артистэу, драматургэу Пэрэныкъо Чатибэ къе­джагъ. Ащ зэрэ­хи­гъэунэфы­кIы­­гъэу, Е. Ма­мы­ир искус­ствэм щы­зэ­лъашIэ. Щынджые культурэм и Унэ­шхоу ща­­шIыгъэм Мамый Ерэ­джыбэ ыцIэ фаусынэу Лъэпкъ театрэр къы­­-кIэ­лъэIу.

Залым чIэсхэр къэтэджхи, Ч. Пэ­рэныкъом къы­Iуа­гъэм зэрэдыра­гъа­штэрэр къахэщэу бэрэ Iэгу теуа­гъэх.

Щынджые щапIу­гъэ шIэныгъэ­лэжьхэу Ем­тIылъ Разыет, Агъыр­жьэнэкъо Симхъан, КIэ­сэ­бэжъ Нэфсэт Е. Мамыим фэ­гъэхьыгъэ гущыIэ фабэхэр къа­Iуагъэх.

— Илъэс 87-рэ Щынджые щызгъэшIагъ, мыщ фэдэ гуIэтыпIэ унэшхом сычIэсэу, тикъуаджэ щеджагъэхэм къащытхъухэу зыкIи зэхэсхыгъэп. ЗэхэщакIохэм сафэ­раз, — къыIуагъ Токъу Инд­рысэ.

— Цэй Ибрахьим, Цэй Унай, Талъэкъо Сулейман, Бэгугъэ Щы­лъэхъан, Трахъо Лыу, орэдыIо цIэ­рыIоу Муслим Магомаевым янэу Къэнджалэ Айщэт, нэмыкI­хэри культурэм, IофшIэным цIэ­рыIо щыхъугъэх, — къы­Iуагъ КIэ­лэбый Зурыет. — Къуа­джэр цIыфэу ща­пIугъэхэм агъэ­дахэ. Мамый Ерэ­джыбэ ишIу­шIа­гъэ гъашIэм хэкIо­кIэ­щтэп.

dsc_0814Щынджые къо­джэ псэупIэм ипащэу Пратэкъо Мус­­лъим зэха­хьэм осэ ин фи­шIыгъ. Театрэмрэ чылэм дэсхэмрэ язэфы­щытыкIэ зэрэпытэщтыр хи­гъэунэ­фыкIыгъ.

«Псэлъы-хъохэм», нэмыкIхэм къяжэх

Е. Мамыим ипье­сэ техыгъэу А. КIуращынэм ыгъэ­уцугъэ къэгъэ­лъэгъонэу «Псэлъы­хъохэм» хэлэжьагъэх артистхэу М. Устэкъор, З. Зыхьэр, М. Куканэр, М. Зыхьэр, С. Ку­шъур, Ж. Даурыр, А. Бэгъыр. Еплъы­гъэхэм ар ашIогъэшIэгъоныгъ, артистхэм джыри къяжэх. Е. Мамыим иIа­хьылэу Мамый Нурди­нэ пчыхьэзэхахьэм хэлэжьагъэхэм «тхьа­­шъуегъэпсэу» къариIожьыгъ.

ЕмтIылъ Нурбый.

Сурэтхэр зэхахьэм къыщытетхыгъэх.