Проектышхом игъэцэкIэн Адыгеим щырагъэжьагъ

Мыекъопэ районым хэхьэрэ псэупIэхэмрэ Мыекъуапэрэ къякIолIэщт псырыкIуапIэмрэ псыIыгъыпIэмрэ яшIын тегъэпсыхьэгъэ проектышхом игъэцэкIэн Адыгеим щырагъэжьагъ. Адыгэ Республикэм и ЛIышъхьэу КъумпIыл Мурат Мыекъуапэ къепхыгъэ псырыкIуапIэр къызыщежьэрэ къушъхьэлъэ чIыпIэхэм ащыIагъ.

Адыгеим ыцIэкIэ Урысые Федерацием и Къэралыгъо Думэ идепутатэу Владислав Резник, Урысые Федерацием и Президент и Полномочнэ лIыкIоу ЮФО-м щыIэм иаппарат Адыгэ РеспубликэмкIэ ифедеральнэ инспектор шъхьа­Iэу Сергей Дрокиныр, псэолъэшIынымкIэ, транспортымкIэ ыкIи гъогу хъызмэтымкIэ министрэу Валерий Картамышевыр, Мыекъуапэ имэрэу Андрей Гетмановыр, Мыекъопэ районым ипащэу Алексей Петрусенкэр ащ игъусагъэх.

Проектым мэхьанэшхо зэриIэр Адыгеим и ЛIышъхьэ къыIуагъ. КъумпIыл Мурат зэрэхигъэунэфыкIыгъэмкIэ, мы псэуалъэр ары зэлъытыгъэщтыр нэбгырэ мин 300 фэдиз зыщыпсэурэ Мыекъо­пэ районымрэ Мыекъуапэрэ зыпкъ итэу псыр къаIэкIэхьащт-къаIэкIэмыхьащтыр, туризмэмкIэ комплексым республикэм икъушъхьалъэхэм хэхъоныгъэ ща­шIыщт-щамышIыщтыр.

Республикэм ипащэ къызэриIуагъэмкIэ, проектым игъэцэкIэн епхыгъэ Iоф­шIэн пстэухэмкIи зэдырагъэштэн фае. Бюджет мылъкур шIуагъэ къытэу гъэфедэгъэныр, псэуалъэр игъом ухыгъэныр Адыгэ Республикэм и ЛIышъхьэ ренэу инэплъэгъу ригъэтыщт.

«ТицIыфхэм псы дэгъу аIэкIэгъэхьэгъэныр, зэпыу имыIэу псырыкIуапIэм Iоф ышIэныр мэхьанэшхо зиIэ пшъэрылъхэм зэу ащыщ. Теубытагъэ тхэлъэу зэкIэлъыкIоу а пшъэрылъыр зэшIотхыщтыгъ.

Мы лъэныкъомкIэ Адыгеим ыцIэ­кIэ Урысые Федерацием и Къэралыгъо Думэ идепутатэу Владислав Резник Iофышхо ышIагъ.

Республикэм ихэбзэ къулыкъухэм, сенаторхэм, Урысые Федерацием и Къэралыгъо Думэ идепутатхэм акIуачIэ зэрэзэдырахьылIагъэм ишIуагъэкIэ проектым ФедерациемкIэ Советми, Къэралыгъо Думэми, Урысые Федерацием и Правительстви къащыдырагъэштагъ. Ащ ишIуагъэкIэ федеральнэ программэм тыхагъэхьагъ ыкIи псыIыгъыпIэмрэ псырыкIуапIэмрэ яшIын тегъэпсыхьэгъэ проектышхом мылъкоу пэIухьащтыр къытфатIупщыгъ. А проектыр зыдгъэцакIэкIэ, Мыекъопэ районымрэ къалэу Мыекъуа­пэрэ бэкIэ нахьышIоу псыр къаIэкIахьэ хъущт», — хигъэунэфыкIыгъ КъумпIыл Мурат.

Проектыр илъэсищым телъы­тагъ. Псэуалъэм ишIын пае илъэс къэс сомэ миллиардым ехъу къатIупщыщт. Апэрэ чэзыоу псырыкIуапIэм икъутэмакIэ агъэпсынэу щыт. Мыгъэ километрэ 17 фэдиз ашIынэу рахъу­хьэ. ЯтIонэрэ лъэхъа­ным чэзыум псыхъоу Водопадистый зыфи­Iорэм дэжь псырыкIуа­пIэмрэ псыIыгъыпIа­кIэхэмрэ ягъэпсын щаухыщт.

Шъугу къэтэгъэ­кIы­жьы псырыкIопIэ зэхэтыр 1982-рэ илъэ­сым зэрагъэпсыгъагъэр, трубэхэр жъы зэрэ­хъу­гъагъэ­хэр ыкIи бэ­шIагъэу ахэр зэб­лэхъугъэнхэ зэрэ­фэ­ягъэр. Федеральнэ программэу «Урысыем и Къыбл» зыфиIоу 2008 — 2013-рэ илъэсхэм ателъытэгъа­гъэм къы­дыхэ­лъыта­гъэу рес­публикэм сомэ миллиард 1,3-м ехъу къыфатIупщы­гъагъ, ащ ишIуагъэкIэ псырыкIопIэ километри 120,6-м щыщэу километрэ 57,6-р агъэ­псыгъагъ.

Программэр аухыгъагъ, проектым игъэцэкIэн лъагъэкIотэным пае мылъку тищыкIэгъагъ. 2014-рэ илъэсым къыщегъэжьагъэу республикэм ихэбзэ Iэшъхьэтетхэм псырыкIуапIэм ишIын зэраухыщт мылъку къыхэгъэкIыгъэн зэрэфаем фэгъэхьыгъэ зэдэгущыIэгъухэр федеральнэ министерствэхэм адашIыгъэх. Джы мары мэхьанэшхо зиIэ а пшъэрылъыр зэшIуахын алъэ­кIыгъ. 2018-рэ илъэсым къыщегъэжьагъэу 2020-рэ илъэсым нэс хэгъэгумкIэ проект анахь къинхэм зэу ащыщыр Адыгеим щыпхыращын фае, сыда пIомэ псэолъэшIын IофшIэнхэм азыныкъо нахьыбэр къушъхьэ лъа­гэхэм ащагъэцэкIэщтых. Джащ пае технологие пэрытхэр агъэ­федэнхэ, IофшIэнхэр икъоу рахъухьанхэ фаеу хъущт.

ПсырыкIуапIэр затыхэкIэ, Мыекъуапэрэ Мыекъопэ районым ипсэупIэхэмрэ зэпыу имы­Iэу псыр аIэкIэхьащт, чэщ-зымафэм кубометрэ мини 150-м ар нэсыщт. Джыдэдэм чэщ-зымафэм аIэкIахьэрэр псы кубометрэ мини 100.

Адыгэ Республикэм и ЛIышъхьэ ипресс-къулыкъу

Сурэтхэр А. Гусевым тырихыгъэх.