Проектым шъухэлэжьэнэу шъукъырагъэблагъэ

ЧIыопсым икъэухъумэн фэгъэзэгъэ мыкъэралыгъо гупчэу «НАБУ-Кавказым» проектышхоу «Охрана природы через организованный туризм. Развитие экотуризма на малых ООПТ объекта Всемирного природного наследия «За­падный Кавказ» зыфиIорэр ыгъэцэкIэнэу ригъэжьагъ.

Граждан обществэм хэхъоныгъэхэр ышIынхэм фытегъэ­псыхьагъэу УФ-м и Президент игрант къызфагъэфедэзэ, 2018-рэ илъэсым шышъхьэIум къыщегъэжьагъэу 2019-рэ илъэсым бэдзэогъум нэс мыщ епхыгъэ Iофтхьабзэхэр зэхащэщтых.

— Проектым зэрэдыригъа­штэрэм ыкIи IэпыIэгъу къызэ­рэфэхъурэм, ащ осэ ин зэрэфишIыгъэм апае Адыгэ Рес­пуб­ликэм и ЛIышъхьэ тыфэраз, — къыщыхагъэщыгъ чIыопсым икъэухъумэн фэгъэзэгъэ мы­къэ­ралыгъо гупчэу «НАБУ-Кавказ» зыфиIорэм.

Адыгэ Республикэм ичIыопс чIыпIищэу, анахь къагъэгъунэ­хэрэм ащыщхэу «Верховье реки Цица», «Верховья рек Пшеха и Пшехашка», «Хребет Буйный» зыфиIохэрэр къэухъумэгъэнхэм проектыр фытегъэпсыхьагъ.

Мы лъэныкъом хэшIыкI фызиIэ специалистхэр, волонтерхэр IофшIэным къыхэлэжьэнхэ амал яIэщт, чIыопсым икъэухъу­мэнкIэ шIэныгъэу аIэкIэлъхэр ахэм къызэIуахын ыкIи къызфа­гъэфедэн алъэкIыщт. ЭкологиемкIэ туризмэм хэхъоныгъэ­хэр ышIынхэм, тыкъэзыуцухьэрэ ду­наир къэухъумэгъэным, нэмыкI Iофыгъохэм язэшIохын проек-тыр фэIорышIэщт. Джащ фэдэу чIы­опсым исаугъэтхэм язытет зэ­гъэшIэгъэныр, зекIохэм ягъо­гухэр гъэнэфэгъэнхэр проектым къыдыхэлъытагъэх. Волонтер купхэм яслетхэм, эко­логическэ рейдхэм ыкIи нэмыкI Iофтхьэ-бзэ зэфэшъхьаф­хэм специалистхэр ахэлэжьэщтых.

Тикъэралыгъо ичIыопс баиныгъэ икъэухъумэн къыхэлажьэ зышIоигъо къэралыгъо, коммерческэ ыкIи ащ емыпхыгъэ организациехэм ялIыкIохэм, волонтерхэм, нэмыкIхэми проектым игъэцэкIэн яIахь къыхалъхьанэу зэхэщакIохэр къяджэх.

Гъонэжьыкъо Сэтэнай.