Проектхэм адырагъэштагъ

Архитектурэмрэ къэлэгъэпсынымрэ япхыгъэ Iофыгъохэм афэгъэзэгъэ советэу республикэм щызэхащагъэм ичэзыу зэхэсыгъо мы мафэхэм иIагъ. Ар зэрищагъ Адыгэ Республикэм и Премьер-министрэ игуадзэу Сапый Вячеслав.

Мыекъуапэ ыкIи Тэхъутэмыкъое районым ащашIыщт псэуа­лъэхэм зэхэсыгъом ащытегущыIагъэх. Апэрэ Iофыгъоу къа­Iэтыгъэр республикэм икъэ­лэ шъхьаIэ иурамэу Краснооктябрьскэм щашIыщт мыгъомылэпхъэщэ тучанышхом ипроект хэплъэгъэныр ары. Ащ фэгъэ­хьыгъэу къэгущыIагъ муниципальнэ гъэпсыкIэ зиIэ «Къалэу Мыекъуапэ» архитектурэмрэ къэлэгъэпсынымрэкIэ и ГъэIорышIапIэ иотдел ипащэу Светлана Гайдай. Ащ къызэриIуа­гъэмкIэ, зы къат хъурэ псэуа­лъэм квадратнэ метрэ мини 9 ыубытыщт. Автомобильхэм арысэу къекIуалIэхэрэм афытегъэпсыхьэгъэ уцупIэ къыпыщылъ чIыпIэм щашIыщт, машинэ 25-мэ ар ателъытэгъэщт. ЩапIэм ипроект советым хэтхэм дырагъэштагъ.

ШхапIэхэр, офисхэр, автомобильхэм ятехническэ фэIо-фашIэхэр зыщагъэцэкIэщт станциеу Тэхъутэмыкъое районым щагъэпсынэу агъэнафэрэми зэхэсыгъом щытегущыIагъэх. Ар зыфэдэщтыр къыIотагъ район администрацием ипащэ игуадзэу Урыс Бислъан. Проектэу къагъэхьазырыгъэм хэу­къоныгъэхэр Iофтхьабзэм къе­кIолIагъэхэм къыхагъэкIыгъэп.

Тэхъутэмыкъое районым «Тургеневское шоссе» зыфаIоу иIэ чIыпIэм автомобиль тхьакIыпIэу щашIыщтым фэгъэхьыгъэу къэгущыIагъ «Сметекс» зыцIэ проектнэ компанием илIыкIоу Тыгъужъ Азмэт. Ащ къызэриIуа­гъэмкIэ, псэуалъэр аужырэ шапхъэхэм адиштэу гъэпсы­гъэщт. Проектым советым хэтхэм дырагъэштагъ, ау псэуа­лъэм шъоу иIэщтыр зэблэхъугъэн фаеу алъытагъ.

Гъонэжьыкъо Сэтэнай.