Полицейскэ класс зэхащагъ

Илъэс зэкIэлъыкIохэм полицейскэ классхэр гурыт еджапIэхэм къащызэIуахынхэр хабзэ хъугъэ. Джы мыгъэ ар я 10-у Мыекъуапэ игурыт еджапIэу N 17-м щагъэпсыгъ.

ХэушъхьафыкIыгъэ тестированиер, физическэ ухьазырыныгъэмкIэ щыIэхэ шапхъэхэр зытыгъэ кIэлэеджэкIо 25-р а классым рагъэтIысхьагъ.

Адыгэ Республикэм хэгъэгу кIоцI IофхэмкIэ и Министерствэ ипресс-къулыкъу къызэрэщытаIуагъэмкIэ, ведомствэм иIофышIэхэмрэ кIэлэегъаджэхэмрэ зэгъусэхэу мы илъэс еджэгъум классыр зэреджэщт программэр зэхагъэуцуагъ. Практическэ сыхьатхэр ыкIи экскурсиехэр нахьыбэу афызэхащэнхэм анаIэ тырагъэтыщт. ЧIыпIэ отделхэмрэ подразделение зэфэшъхьафхэмрэ еджакIохэр ащэщтых. МэфэкI Iофтхьабзэхэм ыкIи зэнэкъокъухэм ахэлэжьэщтых.