Охътэ благъэм дагъэзыжьынэу

ОшIэ-дэмышIэ Iоф къэмыхъуным ыкIи машIор щынэгъончъэным афэгъэзэгъэ комиссиеу АР-м щызэхащагъэм зичэзыу зэхэсыгъоу иIагъэм анахь шъхьаIэу зыщытегущыIагъэхэм ащыщ псэупIэ-коммунальнэ хъызмэтым ипсэуалъэхэр бжыхьэ-кIымэфэ уахътэм зэрэфэхьазырхэр. Зэхэсыгъор АР-м и Премьер-министрэу Александр Наролиным зэрищагъ.

АР-м псэолъэшIынымкIэ, транспортымкIэ, псэупIэ-ком­мунальнэ ыкIи гъогу хъызмэтымкIэ иминистрэ игуадзэу Лафышъэ Рэмэзанэ къызэрэщигъэгъозагъэхэмкIэ, котельнэ 320-рэ, фабэм ирыкIуапIэу километрэ 300-м ехъу, фэтэ­рыбэу зэхэт унэ 1653-рэ, гъэстыныпхъэ шхъуантIэм иры­кIуапIэу километрэ мини 3-м ехъу, псыкъычIэщыпIэхэр, псырыкIуапIэхэр, нэмыкIыбэр рес­публикэм щагъэхьазырыгъэх. Шапхъэу щыIэхэм зэращыгъэнэфагъэмкIэ, гурытымкIэ чэщ-зымафэм фабэр градуси 8-м нэсэу къеIыхымэ ары унэхэр агъэплъынхэу зырагъэжьэщтыр. Къалэу Мыекъуапэ, Шэуджэн, Кощхьэблэ, Теуцожь ыкIи Джэ­джэ районхэм якIэлэцIыкIу Iы­гъыпIэхэр, еджапIэхэр, медицинэм иучреждениехэр агъэфэ­бэнэу рагъэжьагъ.

Арэу щытми, мы лъэны­къомкIэ джыри щыкIагъэхэр щыIэх. Районхэмрэ къалэхэмрэ псэупIэ-коммунальнэ хъызмэтым ипсэуалъэхэм Iоныгъом и 1-м нэс IофшIэнхэр ащаухынхэшъ, чъэпыогъу мазэм и 1-р къэмысызэ кIымафэм зэрэфэ­хьазырхэр къэзыушыхьатхэрэ тхылъхэр къаратынхэ фэягъэ. Ар икъоу гъэцэкIагъэ хъугъэп. Сыда пIомэ Ростехнадзорым зеуплъэкIухэм щыкIагъэхэр къы­хигъэщыгъэх.

Муниципальнэ образованиехэм ащыщхэм ахэр дагъэзы­жьы­гъэх, Красногвардейскэ
ыкIи Мыекъопэ районхэр, Адыгэ­къалэ ауж къинагъэх. Премьер-министрэм ахэм япащэхэм зызафегъазэм, къыха­гъэщыгъагъэхэр дагъэзыжьы­гъэхэу, джы тхылъхэр агъэхьазырхэу ары къызэраIуагъэр.

— Бжыхьэ-кIымэфэ уахътэу унэхэр зыщагъэфэбэщтхэм зы­фэжъугъэхьазырынэу икъун уахътэ щэIэми, илъэс къэс джы­рэ фэдэм щыкIагъэхэр бэу къычIэщых, — къыIуагъ Александр Наролиным Iофхэм язытет ымыгъэразэу. — Гъэфэбэгъу уахътэр къэсыгъ, шъузщыхьазырын фэе уахътэр блэ­кIыгъ, шъуиIофшIэн жъугъэ­псын­кIэнышъ, ом зызэрихъокIэу, нахь чъыIэ къэмыхъузэ пстэури шъу­ухыныр шIокI зимыIэ Iоф.

Законым къызэрэщыдэлъытагъэмкIэ, Ростехнадзорым джыри зэ ыуплъэкIужьхэу, зыпари къыхимыгъэщымэ ары паспортхэр къызаритыщтхэр. Наролиным ащ илIыкIуи зы­фигъазэзэ, уплъэкIунхэр амыгъэгужъонхэу риIуагъ.

Гъэстыныпхъэ шхъуантIэм ыкIи электричествэм якъэтын епхыгъэхэ псэуалъэхэм ягъэхьазырыни игугъу ашIыгъ. АО-у «Газпром газораспределение Майкоп» зыфиIорэмрэ «Кубаньэнергом» и Адыгэ электрическэ сетьхэмрэ ялIыкIоу къэгущыIагъэхэм къызэраIуагъэмкIэ, псэупIэхэм ягъэфэбэгъу уахътэ изыфэгъэхьазырынкIэ мы предприятиехэм пшъэрылъэу яIэгъэ пстэури игъом ыкIи икъоу гъэцэкIагъэ хъугъэ.

Псыхъоу Пшызэ инэпкъэу Тэхъутэмыкъое районым ит къуаджэу АдыгеякIэм дэжькIэ щыIэм епхыгъэ Iофыгъохэми зэхэсыгъом щатегущыIагъэх. ЦIыфэу ащ дэсхэм ащыщхэм тхьаусыхэ тхылъэу къатыгъэр ары къызщежьагъэр. УФ-м и МЧС АР-мкIэ и ГъэIорышIапIэ зэригъэунэфыгъэмкIэ, нэпкъым щыщэу метрэ 30-р еохыгъ, 200 фэдизым гуатIыкIызэ, ятIэр дащыгъ, псыр къыдэкIуаемэ къыдэкIыным ищынагъо щыIэ хъугъэ.

«Кубаньмелиоводхозым» и ГъэIорышIапI псыхъоу Пшызэ инэпкъхэр зэпхыгъэхэр. Ащ илIыкIоу зэхэсыгъом къыщыгущыIагъэм къызэриIуагъэмкIэ, чIыгу Iахьхэу ащ Iулъхэр хэ­бзэнчъэу физическэ лицэхэм аштагъэхэу агъэфедэх, ахэм ямысагъэкIэ нэпкъыр щынагъо хъугъэ. Мы Iофым тхылъхэу епхыгъэхэр правэухъумэкIо органхэм аIэкIагъэхьагъэх. Ахэр ахаплъэхэу, законыр зыукъуагъэхэм къаIахыжьымэ, агъэпытэжьынхэу хьазырых.

Тэхъутэмыкъое районэу нэ­пкъыр зыдэгъэзагъэм ипащэхэм яеплъыкIи къыраIотыкIыгъ. Нэпкъым гуамыхыным, амы­гъэфыкъоным пае къэралыгъо регистрацие пшIын фаеу ахэм алъытагъ, зыдырамыгъэштэраби Iофым хэлъэу къаIуагъ.

ХЪУТ Нэфсэт.