Нэфым игъогу утырещэ

ХъутIыжъ Аслъанбый-хьаджэ Исмахьилэ ыкъор зиавтор-зэхэгъэуцуакIоу тхылъэу «Путь к свету. Записки о вечном» зыфиIорэр бэмышIэу, 2017-рэ илъэсым, Мыекъуапэ урысыбзэкIэ пчъагъэмкIэ 500 хъоу ООО-у «Качествэм» къыщыдэкIыгъ.

IофшIагъэр авторым ятэ-янэхэу — ХъутIыжъ Исмахьилэ Заурбэч ыкъомрэ ХъутIыжъ (Къэращэкъо) Цуцэ Айтэч ыпхъумрэ зэрафигъэшъуашэрэр апэрэ зэгохыпIэм тетхагъ. Тхылъыр темэ шъхьаIэр къызэIузыхырэ шъхьи 4-у зэхэт: «Веротерпимость Ислама»; «Великие люди Ислама»; «О нравственности»; «О Коране и хадисах» зыфиIохэрэр.

А. ХъутIыжъым игущыIапэ ар къызэIуехы, тхылъым ыкIэм авторым литературэу ыгъэфедагъэр къыщытыгъ. УблапIэм къыщеIо тхакIом ыкIи щыкIигъэтхъыгъ, Алахьым и Тхыгъэ инэу къытфитIупщыгъэм ылъапсэр шъыпкъэр арэу зэрэщытыр. Ислъамым гукIэ зезыпхыгъэу, ар зышIогъэшIэгъонэу зэзыгъашIэхэрэм, ащ лъапсэу иIэр, мэхьанэу пкъырылъыр агурыгъэIогъэным ыкIи а шIэныгъэхэмкIэ цIыф лъэпкъхэм азыфагу зэфэгумэкI-зэрэлъытэныгъэ илъхьэгъэным зэрэфытегъэпсыхьагъэр къыщыIуагъ. Урысые хэгъэгушхомкIи тхылъым шIуагъэу хэлъыр гущыIапэм къыхигъэщыгъ. УрысыбзэкIэ зэрэтхыгъэми тхылъыр нахь Iэрыфэгъоу къешIы. Адыгеим ит еджапIэхэм ачIэсых, ащеджэх цIыф лъэпкъ зэфэшъхьафхэм ялIыкIохэр, ахэм урысыбзэр зэрагъашIэшъ, еджэнхэ амал яI, IофшIагъэми тхылъеджабэ ыгъотыщт.

Мыщ дэжьым ХъутIыжъым игущыIэ къыщыхигъэщыгъ Адыгэ Республикэм ислъамыр зыщызэрагъашIэрэ еджапIэ зэримытыр. Ащ елъытыгъэу, мы тхылъым щызэхэугъоегъэ шIэныгъэхэр цIыфхэм аIэкIэгъэхьагъэхэмэ, ислъамыр зыфэдэ шъыпкъэр ашIэу, зэхафэу, бзаджи, Iаий агу къимыхьэу, шIум, нэфым, фабэм, гукIэгъум, къэбзагъэм нахь зафагъэзэн зэралъэкIыщтыр къыщиIуагъ.

2012-рэ илъэсым дин общинэхэм ялIыкIохэм зэIукIэгъоу В. В. Путиным адыриIагъэм къыщиIогъэгъэ псалъэри ХъутIыжъ Аслъанбый тыгу къыгъэкIыжьыгъ.

«Нам нужно деятельное, прямое, эффективное, ежедневное участие религиозных организаций в жизни общества и государства. И церковные организации, представляющие традиционные конфессии, да и все другие религиозные организации сыграли очень большую роль в возрождении нашей страны. В прежние десятилетия светcкость понималась таким образом, что церковь и традиционные конфессии фактически ущемлялись в правах. Вот такого примитивизма сегодня нам ни в коем случае допустить нельзя. Между государством и религиозными организациями должен установиться совершенно другой режим взаимоотношений — режим партнерства, взаимной помощи и поддержки». Тхылъым ислъамым цIыфыр гъогу нэфым тезыщэрэ шIошъхъуныгъэ лъэпсэ бай зэриIэр уегъашIэ, ащ епхыгъэ шIэныгъабэр къыпфызэхефы, ипкъэуитфымэ ягъэцэкIэн къыщиIотыкIыгъ. IофшIагъэм итхынкIэ авторым материал шъхьаIэхэу гъэзетэу «Свет» зыфиIорэм къыщыхэутыгъэхэр ары ыгъэфедагъэхэр. Адыгэ Республикэмрэ Краснодар краимрэ ябыслъымэнхэм я ДиндэлэжьапIэ мы аужырэ илъэситфым Iофэу зэшIуихыгъэр ыкIи Мыекъопэ мэщыт шъхьаIэм Iофтхьабзэу щызэхащагъэхэр къыщыIота-гъэх. Авторыр тхылъым игъэхьазырын-къыдэгъэкIынкIэ зэкIэ къыдеIагъэхэм лъэшэу зэрафэразэр пэублэм къыщиIуагъ.

Адыгэ республикэ общественнэ органиазцием илингвист-экспертхэм я Ассоциациеу «Аргумент» зыфиIорэм икомиссие хэт специалистхэр тхы-

лъым еджагъэх, А. И. ХъутIыжъым итхылъыкIэу «Путь к свету. Записки о вечном» зыфиIорэр къыхэутыгъэныр игъоу алъэгъугъ. IофшIагъэм мыхъун гупышсэ зэрэхэмытыр, къызэрэщымыIуагъэр, цIыфхэр, лъэпкъхэр зэфэзыгъэблыхэрэ е зыушъхьакIухэрэ — абзэ, якъэхъукIэ, яшэн-хабзэхэм афэгъэхьыгъэу — зэрэхэмытыр хагъэунэфыкIыгъ. Джащ фэдэу УФ-м изыкIыныгъэ е иконституционнэ гъэпсыкIэ-лъапсэ зыукъорэ джэпсалъи, гущыIэ емыкIуи зэрэхэмытыр комиссием къыушыхьатыгъ. Мы зэфэхьысыжьыр тхылъым икупкI-шъуашэкIэ аужырэ нэкIубгъом ит, мыхъури тедзэжьыгъэу, аIапэ чIэдзэжьыгъ. Нэфым игъогу утезыщэрэ тхылъэу шIошъхъуныгъэ пытэхэр къыозытыщтхэм «гъогу мафэ» иIэнэу фэтэIо.

ДЗЭУКЪОЖЬ Нуриет.