Нэбгырищыр псым ытхьэлагъ

Гъэтхапэм и 9-м Красногвардейскэ районым ит Пшызэ псыIыгъыпIэм Адыгэ Республикэм щыщ нэбгырищ хитхьэлыхьагъ.

Илъэс 37-рэ зыныбжь хъулъфыгъэм ихьадэ къэгъэнэжьакIохэм къыхахыжьыгъ. Нэужым илъэс 34-рэ зыныбжь хъулъфыгъэми ихьадэ къагъотыжьыгъ. Илъэс 31-рэ зыныбжь бзылъфыгъэм ихьадэ джыри лъэхъух. Урысыем и Следственнэ Комитет и ГъэIорышIапIэу Адыгэ Республикэм щыIэм Красногвардейскэ районымкIэ иотдел мы хъугъэ-шIагъэмкIэ зэхэфын Iофтхьабзэхэр регъэкIокIых.

ПэшIорыгъэшъэу къызэратыгъэмкIэ, зэшъхьэгъусэхэм яныбджэгъухэр акIыгъухэу гъэтхапэм и 8-м Пшызэ псыIыгъыпIэ Iушъом ащыщ горэм къызыхъугъэ мафэр щыхагъэунэфыкIынэу кIуагъэх. Мафэм сыхьатыр 2-хэм адэжь гъучI къуашъоу мотор зэрытым хъулъфыгъитIур ыкIи бзылъфыгъитIур итIысхьэхи псым техьагъэх. Сыхьат фэдиз тешIагъэу зызыщагъэпсэфырэ чIыпIэм къекIолIэжьынхэу къагъэзэжьыгъэу, рулым лъэшыщэу хъулъфыгъэр зыкIырэум къуашъор зэпыригъэзагъ, сыхьатищ зытешIэм ар псым чIихьагъ. Псы чъыIэм сыхьати 3 — 4 хэсыгъэхэ нэбгырищыр ытхьэлагъ. Ар зылъэгъугъэ бзылъфыгъэр псым къыхэкIыжьыгъэу чъыгым тесэу гъэтхапэм и 9-м пчэдыжьым сыхьатыр 9-хэм адэжь пцэжъыяшэ горэм къыгъотыгъ. Хъугъэ-шIагъэр зыщыхъугъэ чIыпIэм следовательхэм Iоф щашIэ.