Ны мылъкум къыхэхыгъэу…

Демографием изытет къэралыгъом нахьышIу щышIыгъэным фэшI унагъом ыкIи кIэлэцIыкIухэм IэпыIэгъу ятыгъэным епхыгъэ Iофтхьабзэу УФ-м и Правительствэ кIэщакIо зыфэхъугъэхэм адиштэу, ны мылъкум фэгъэхьыгъэ федеральнэ программэм мы илъэсым зэхъокIыныгъэхэр фэхъугъэх.

2018-рэ илъэсым ищылэ мазэ и 1-м къыщыублагъэу унагъоу зигъот макIэхэм ны ­мылъкум къыхэхыгъэу мазэ къэс ахъщэ къафэкIонэу агъэ­псын амал яIэ хъугъэ. Къызэратыщтхэр узэрыпсэун плъэ­кIыщт ахъщэ анахь макIэу уна­гъор зэрыс субъектым щагъэнэфагъэм фэдизрэ ныкъорэм шIомыкIэу къызIэкIахьэхэрэр ары. АдыгеимкIэ ар сомэ 14755-м ехъу. Мазэм унагъом ратыщтыр сабыир зэрыпсэун ылъэкIыщт ахъщэ анахь макIэу субъектым щагъэнэфагъэм фэдизыщт. ТиреспубликэкIэ ар сомэ 9325-рэ мэхъу.

ЛэжьапкIэу унагъом къи­хьэрэр, премиехэр, пенсиехэр, социальнэ ахъщэ тынхэр, стипендиехэр, компенсацие зэфэшъхьафхэр, нэмыкIхэр къыда­лъытэхэзэ гъотэу иIэр агъэнафэ. Ны мылъкум къыхэхыгъэ ахъщэ тыныр ыгъэпсынэу ПенсиехэмкIэ фондым зыфэзыгъазэрэм ахэр къэзыушыхьатырэ тхылъхэри диштэнхэ фае. Ежь фондым ылъэныкъокIэ къыфакIорэм пае тхылъ къыгъэлъэгъон ищыкIагъэп. Унагъом гъотэу иIэм хамылъытэрэр ошIэ-дэмы­шIэ хъугъэ-шIагъэм пае зэтыгъоу къатыгъэ ахъщэ IэпыIэ­гъур, бан­кым идепозитхэм е амы­гъэкощырэ мылъкоу бэджэндэу ытыгъэм къакIэкIуагъэхэр ары.

Ны мылъкум къыхэхыгъэ ахъ­щэр сабыим ыныбжь илъэсрэ мэзихрэ мэхъуфэкIэ къатыщт. Апэ лъэIу тхылъыр ным зитыкIэ, зы илъэсрэ ахъщэр къэкIонэу агъэпсы, ар икIымэ, икIэрыкIэу ытыжьын фае. Ны мылъкум исертификат къыратыным пае лъэIу тхылъыр зитыкIэ, ащ къы­хэ­хыгъэ ахъщэр мазэ къэс къы­фэкIоным фэгъэ­хьыгъэри кIигъэ­гъун ылъэкIыщт. Сабыим ыныбжь мэзихым нэмысызэ ар зытыгъэм къызы­хъугъэм къыщыублагъэу къыфа­лъытэщт, ащ шIокIыгъэмэ, лъэIу тхылъыр зыщитыгъэм къыще­гъэжьагъ къызыфэкIощтыр.

Ахъщэр банкым счетэу щыриIэр ары къызэрагъэхьащтыр. Ащ пае нэмыкI тхылъэу уна­гъом ытыгъэхэм ягъусэу счетыр къэ­зыушыхьатырэри къыгъэлъэгъон фае.