Ным ипенсие зыщызэIукIэрэми…

Хэбзэгъэуцугъэм къызэрэдилъытэрэмкIэ, ны мылъкур ным ипенсие зыщызэIукIэрэми бгъэкIон плъэкIынэу щыт. Ар бгъэфедэмэ зэрэпшIоигъор къызщиIорэ лъэIу тхылъыр ПенсиехэмкIэ фондым и Къутамэу узэпхыгъэм ептыни плъэкIыщт, электроннэ шIыкIэр къызфэбгъэфедэу, «унэе кабинет» уиIэмэ, ащкIэ бгъэхьыми хъущт.

Бзылъфыгъэм ащ фэдэу пенсиер зыщызэIукIэрэм ыгъэкIогъэ ны мылъкур ыныбжь нэсэу пенсием зыкIокIэ къаIихыжьын ылъэкIыщт. Ащ пае хэбзэгъэуцугъэм лъэныкъуищ къыделъытэ. ГущыIэм пае, пIэлъэ гъэнэфагъэм къыкIоцI къатырэ ахъщэ тынэу къыIэкIэхьанэу ыгъэпсын фит. ПIалъэу ыгъэнэфэщтыр ежь бзылъфыгъэр ары къыхэзыхырэр, ау ар илъэси 10-м нахь мэкIэнэу щытэп. Ахъщэ тыныр ны мылъкоу пенсиер зыщызэIукIэрэм ыгъэкIуагъэр ары къызхэхыгъэ хъущтыр.

Джащ фэдэу пенсие зэIукIагъэу къыратыжьын ылъэкIыщт. Ар мазэ къэс щэIэфэ къыратыщт. Мыр загъэнафэкIэ, ны мылъкум имызакъоу, нэмыкIэу ипенсие зыщызэIукIэрэм ихьэгъэ пстэури къыщыдалъытэ. Пенсием кIонэу ыныбжь зыщикъугъэм ехъулIэу ипенсие зыщызэIукIэрэм щызэрэугъоигъэр пенсие страхованиемкIэ иIахь ипроценти 5 нахьыбэ мыхъурэмэ, ны мылъкоу пенсиер зыщызэIукIэрэм кIуагъэр зэтыгъо ахъщэ тынэу бзылъфыгъэм къаIихыжьын фит. Джащ фэдэу сэкъатныгъэ зэриIэм е зыгъэшхэн имыIэу къызэрэнагъэм афэшI страхованиемкIэ пенсие къызэратыхэрэми, илъэс IофшIагъэу иIэр зэрэмакIэм къыхэкIыкIэ, страхованиемкIэ пенсие зыфамыгъэуцушъугъэхэми аущтэу зэтыгъоу къаIахын фитых.

Ащ тхылъэу ищыкIагъэхэр:

— бзылъфыгъэу сертификатыр зыем илъэIу тхылъ. Ар зэрэтхыгъэн фаер ПенсиехэмкIэ фондым и Къутамэу зэпхыгъэм къыщырагъэлъэгъущт;

— ны мылъкум исертификат;

— пенсиехэмкIэ шIокI зимыIэ страхование зэришIыгъэр къэзыушыхьатырэ тхылъыр (СНИЛС);

— къэралыгъом зэрицIыфыр къэзыушыхьатырэ тхылъыр;

— зыгорэкIэ ны мылъкур зые бзылъфыгъэм ежь ышъхьэкIэ ымытхэу, цыхьэ зыфишIырэ илIыкIо лъэIу тхылъыр къырегъэтымэ, ар къэралыгъом зэрицIыфыр къэзыушыхьатырэ тхылъыр.

Бзылъфыгъэм ипенсие зыщызэIукIэрэм ны мылъкур ыгъэкIонэу къыхихыгъэу кIэгъожьымэ, ежь зыщыфэе уахътэм, хэбзэгъэуцугъэм тетэу, зэблихъужьын фит. Ащ пае ипенсие фагъэнэфэным нэмысызэ, лъэIу тхылъыр ПенсиехэмкIэ фондым и Къутамэу зэпхыгъэм рихьылIэнэу ары ныIэп ищыкIагъэр.

Зэблэпхъун фаеуи къыхэкIы

ПенсиехэмкIэ шIокI зимыIэ страхованием исвидетельствэ (СНИЛС) цIыфым пенсиехэмкIэ шIокI зимыIэ страхованием исистемэ зызэрэщитхыгъэр къеушыхьаты. УФ-м ПенсиехэмкIэ ифонд зэкIэ къэралыгъом ис пстэури, кIэлэцIыкIухэри, зихэхъогъухэри ахэтхэу, ары пакIошъ, IэкIыб къэрал къикIыгъэхэри а системэм щетхых. Ащ зыщатхыгъэ уахътэм къыщыублагъэу страхованиемкIэ номер гъэнэфагъэ иIэу лицевой счет ПенсиехэмкIэ фондым цIыфым къыфызэIуехы. Ар щэIэфэкIэ ащ епхыгъэщт.

СНИЛС-р пенсием игъэпсынкIэ цIыфым зэрищыкIагъэм имызакъоу, электроннэ шIыкIэм тетэу къэралыгъо фэIо-фашIэхэр къызIэкIигъэхьанхэмкIи, фэгъэкIотэнхэр ыгъэфедэнхэмкIи къышъхьэпэным фэгъэпсыгъ. Джащ фэдэу ар иIэмэ, фэIо-фэшIэ зэфэшъхьафхэм апае тхылъэу ыгъэхьазырыщтри нахь макIэ мэхъу.

Мы свидетельствэм цIыфым ежь иунэе лицевой счет щыгъэнэфагъ, ыцIи, ылъэкъуацIи, ятэ ыцIи, къызщыхъугъэ мафэри, илъэсыри, чIыпIэри итых, бзылъфыгъэмэ е хъулъфыгъэмэ къыщеIо, пенсиехэмкIэ шIокI зимыIэ страхованием исистемэ зыщатхыгъэри ит. Мыхэм ащыщ зэхъокIыныгъэ горэ фэхъугъэмэ е мытэрэзэу тхыгъэу къычIэкIыгъэмэ, тхылъыр елбэтэу зэблэпхъун фае. Ащ пае ПенсиехэмкIэ фондым и Къутамэу узэпхыгъэм е МФЦ-м лъэIу тхылъымрэ СНИЛС-у къызэблахъун фаемрэ епхьылIэщтых. Ахэм захаплъэхэрэм ыуж свидетельствэр гъэтэрэзыжьыгъэу къыуатыжьыщт, ау о къыопхыгъэ номерыр зытетым тетэу къэнэжьыщт.

ЗыгорэкIэ страхованиемкIэ свидетельствэр къычIэунагъэми, икIэрыкIэу къыдэпхыжьын плъэкIыщт. ПенсиехэмкIэ фондым и Къутамэу узэпхыгъэм уекIуалIэмэ, IофшIэгъу мэфитфым къыкIоцI ар къыпфашIыжьыщт. МФЦ-м ащ фэдэ лъэIу уиIэу уеолIагъэмэ, мэфи 10 нахьыбэ темышIэу уиIоф зэхафыщт.