Нартым итыжьын

Урысыем дзюдомкIэ изэнэкъокъу Ингушетием икъалэу Назрань щыкIуагъ. Адыгэ Республикэм ибэнакIохэр зэIукIэгъухэм ахэлэжьагъэх.

Мыекъопэ къэралыгъо технологическэ университетым ще­джэрэ Мерэм Дамир килограмм 60-м нэс къэзыщэчыхэрэм якуп иIэпэIэсэныгъэ къыщигъэлъэ­гъуагъ.

БэнэкIо 50-м нахьыбэ купым хэтыгъ. Бурятием, Рязань, Челябинскэ, Ханты-Мансийскэ, Иркутскэ къарыкIыгъэхэм Д. Мерэмыр атекIуагъ. Дышъэм икъыдэхын фэгъэхьыгъэ зэIукIэгъум Свер­д­ловскэ хэкум илIыкIоу С. Гаджиевым алырэгъум щебэныгъ. Дамир гуетыныгъэ ин къызхи­гъэ­фагъ, ау Урысыем гъогогъуи­тIо дышъэр къыщызыхьыгъэ С. Га­джиевыр а мафэм нахь лъэшыгъ, ящэнэрэу хэгъэгум ды­шъэр къы­щыдихыгъ.

Мерэм Дамир Джыракъые щапIугъ, иапэрэ тренерыр Акъуш Бислъан. Джырэ уахътэ Адыгэ Республикэм изаслуженнэ тренерэу Хьакурынэ Дамир ипащэу дзюдомкIэ мэбанэ.

Д. Мерэмыр самбэмкIи банэщтыгъ. Илъэс 21-м нэс зыныбжь­хэм язэнэкъокъу зыхэлажьэм, Европэм дышъэр къыщыфагъэшъошагъ. Урысыем хъулъфы­гъэхэм язэнэкъокъу зыщызэхащэм, джэрзыр къыдихыгъ.

— БэнэкIо 600-м нахьыбэ Урысыем изэнэкъокъу хэлэжьагъ, — къытиIуагъ Адыгеим изаслуженнэ тренерэу Хьакурынэ Дамир. — Командэхэри шъхьафэу зэбэныгъэх. Тиреспубликэ щыщ­хэр Къыблэм ихэшыпыкIыгъэ командэ хэтыгъэх, ящэнэрэ чIыпIэм икъыдэхын фэбэнагъэх. Мерэм Дамир хэгъэгум дзюдомкIэ ихэшыпыкIыгъэ командэ аштагъ, зэIукIэгъухэм зафегъэ­хьазыры.

Сурэтым итхэр: Мерэм Дамиррэ Хьакурынэ Дамиррэ.