Налщык щэкIо

Дунэе фестивалэу «Къыблэ сценэр» зыфиIорэр къалэу Налщык щыкIощт. ШэкIогъум и 21-м Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм «Кавказский меловой кругыр» къош республикэм къыщигъэлъэгъощт.

— Дагъыстан, Ингушетием, Къэрэщэе-Щэрджэсым, Чэчэным, Темыр Осетием — Аланием, Къыблэ Осетием, Абхъазым, Став­рополь краим, Къэбэртэе-Бэлъкъарым, Адыгеим ятеатрэхэр Дунэе фестивалым хэлэжьэщтых, — къытиIуагъ республикэм и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэу ХьакIэгъогъу Къэсэй. —Театрэм лъэпкъхэр зэфещэх, цIыфхэр нахьышIоу зэрэшIэнхэм фэшI щыIэныгъэм диштэхэрэ Iофтхьабзэхэр егъэцакIэх.
Сыхъум, Владикавказ, Грознэм ащыкIогъэхэ фестивальхэм Адыгеим и Лъэпкъ театрэ ахэлэ­жьагъ, щытхъуцIэхэр къыфагъэшъоша­гъэх.