«Налмэсым» илIыкIохэр ригъэблэгъагъэх

АР-м и ЛIышъхьэу ТхьакIущынэ Аслъан Адыгэ Республикэм и Къэралыгъо академическэ къэшъокIо ансамблэу «Налмэсым» идиректорэу Бастэ Азмэт, ихудожественнэ пащэу Хъоджэе Аслъанэ ыкIи ансамблэм хэтхэм ащыщхэр тыгъуасэ ригъэблэгъагъэх. ЗэIукIэгъум хэлэжьагъ АР-м культурэмкIэ иминистрэу Къулэ Мыхьамэт.

«Налмэсыр» Китаим рагъэблэгъагъэу мазэрэ ныкъорэ къэтыгъ, джырэблагъэ къэкIожьыгъ. Ары республикэм ипащэ артистхэм аIукIэным ушъхьагъу шъхьаIэ фэхъугъэр. Адыгеим, Урысыем инэмыкI субъектхэм ямызакъоу, IэкIыб къэралхэми «Налмэсыр» зэращызэлъашIагъэм, миллиард пчъагъэ зэрыс къэралыгъом рагъэблагъэхи концертхэр къызэрэщатыгъэхэм зэрэрыгушхорэр ащ къыхигъэщыгъ.

— Лъэпкъым ыбзэ, ихабзэхэр, икультурэ щыIэхэмэ, ежь лъэпкъыри щыIэщт, ахэр ары ыкIуачIэ хъурэри, — къыIуагъ ащ. — Адыгэ лъэпкъым ыкIуачIэ пытэным шъо шъуиIахьышхо хэшъолъхьэ, икультурэ, ишэн-хабзэхэр къашъохэмкIэ нэмыкI лъэпкъхэм алъыжъугъэIэсынхэ, шIу яжъугъэлъэгъунхэ шъолъэкIышъ, ащ пае лъэшэу тышъуфэраз. Тырэгушхо тикъэшъокIо ыкIи орэдыIо ансамблэхэу «Налмэсымрэ» «Ислъамыемрэ» Адыгеим имызакъоу, Урысыем икультурэ чIыпIэ гъэнэфагъэ зэрэщаубытыгъэм.

«Налмэсым» ипащэхэмрэ икъэшъуакIохэмрэ Китаим зэрэщыIагъэхэм къытегущыIагъэх, яеплъыкIэхэр къыраIотыкIыгъэх. Ахэм къызэраIуагъэмкIэ, мы къэралыгъом ичIыпIэ зэфэшъхьафхэм концерти 10 къащатыгъ. ЦIыфэу ахэм къякIуалIэхэрэм лъэшэу тикъашъохэр зэрашIогъэшIэгъоныгъэхэр, ягуапэу къызэряплъыщтыгъэхэр къыхагъэщыгъ.

ТхьакIущынэ Аслъан ансамблэм игухэлъхэм, республикэм икъуаджэхэр къакIухьанхэу агъэнэфагъэмэ къыкIэупчIагъ, амалэу яIэмкIэ IэпыIэгъу зэрафэхъущтыр къыхигъэщыгъ.

ХЪУТ Нэфсэт.