Мэхьанэшхо зиIэ проект

Къэралыгъо корпорациеу «Росатомым» иинвестиционнэ проектышхохэм ащыщэу жьыбгъэкIэ Iоф зышIэрэ паркым игъэпсын Адыгеим щылъагъэкIуатэ. Жьыбгъэм ыкIуачIэ къызфагъэфедэзэ энергетикэм ылъэныкъокIэ республикэм хэхъоныгъэ ышIыным проектыр фэIорышIэщт. Ар гъэцэкIагъэ зэрэхъурэм лъэплъэ ыкIи мэхьанэшхо реты Адыгэ Республикэм и ЛIы­шъхьэу КъумпIыл Мурат. Проектыр щы­Iэныгъэм щыпхырыщыгъэным пае республикэм ипащэхэр компанием сыд фэ­дэрэ лъэныкъокIи IэпыIэгъу фэ­хъух, ащ пае «зы шъхьан­гъупчъэкIэ» заджэхэрэ шIыкIэмкIэ проектым игъэцэкIэн лъагъэкIуатэ.

Ащ иапэрэ едзыгъо къыдыхэлъытагъ МВти 150-м кIэ­хьэрэ кIуачIэ зиIэ жьыбгъэкIэ Iоф зышIэрэ станцие Шэуджэн ыкIи Джэджэ районхэм ащы­гъэпсыгъэныр. Мы проектым изэшIохын республикэм ифедэ хэлъ, сыда пIомэ икIэрыкIэу къызфагъэзэжьырэ энергетикэм ихэхъоныгъэ амал къытыщт шъолъырым энергием ылъэныкъокIэ фэныкъоныгъэу иIэхэр ригъэкъужьынхэмкIэ.

Непэрэ мафэм ехъулIэу жьыбгъэкIэ Iоф зышIэщтхэ апэрэ пкъыгъохэр агъэуцугъэх, ялъэгагъэ метри 100 мэхъу. ЗэрагъэнэфагъэмкIэ, зэкIэмкIи ахэм япчъагъэ 60 хъущт, пкъыгъо пэпчъ МВт 2,5-рэ кIуачIэ иIэщт. Илъэсэу тызыхэтым иIоныгъо мазэ ехъулIэу апэрэ генерациер паркым къытыщт. Энергие тедзэр экономикэм ыкIи со­циальнэ лъэныкъом хэхъоны­гъэхэр ышIынхэм фэIорышIэщт.

КъэIогъэн фае Адыгеим имы­закъоу, УрысыемкIи мыр проектышхоу зэрэщытыр. Респуб­ликэм иэкономикэ хэхъоны­гъэхэр ышIынхэм, шъолъырым иэнергосистемэ зыпкъ итэу Iоф ышIэным афытегъэпсыхьагъ.

ТХЬАРКЪОХЪО Адам.