МэфэкIым зеушъомбгъу

Адыгэ Республикэм и Къэралыгъо филармоние тыгъуасэ мэфэкI зэхахьэу щыкIуагъэр культурэм иIофышIэ и Мафэ фэгъэхьыгъагъ. Урысыем имэфэкI анахь ныбжьыкIэхэм ар ащыщ.

Республикэм и Премьер-министрэ игуадзэу Наталья Широковар ти ЛIышъхьэу КъумпIыл Мурат ыцIэкIэ мэфэкI зэхахьэм хэлажьэхэрэм къафэгушIуагъ. Культурэм иIофышIэхэр ясэнэхьаткIэ цIыфхэм зэралъыIэсыхэрэр, гушIуагъо къафахьын зэралъэкIырэр Наталья Широковам хигъэунэфыкIыгъэх.

Адыгеим и Парламент и Тхьаматэу Владимир Нарожнэр, республикэм культурэмкIэ иминистрэу Аулъэ Юрэ мэфэкI зэхахьэм къыщыгущыIагъэх.

Республикэм и ЛIышъхьэу КъумпIыл Мурат иунашъокIэ щытхъуцIэхэр зыфаусыгъэхэм Н. Широковар афэгушIуагъ. «Адыгэ Республикэм инароднэ артист» зыфиIорэ цIэ лъапIэр зэрафагъэшъошагъэхэр къэзыушыхьатырэ тхылъхэмрэ бгъэхэлъхьэ тамыгъэхэмрэ аритыжьыгъэх.

«Адыгеим изаслуженнэ артист», «Адыгеим культурэмкIэ изаслуженнэ IофышI» зыфиIорэ щытхъуцIэхэр зыфаусыгъэхэм, щытхъу тхылъ зэфэшъхьафхэр зыфагъэшъошагъэхэм Н. Широковар, В. Нарожнэр, Ю. Аулъэр афэгушIуагъэх.

МэфэкI концертым хэлэжьагъэх Адыгеим и Къэралыгъо ансамблэхэу «Ислъамыер», «Налмэсыр», респуб­ликэм и Къэралыгъо филармоние исимфоническэ оркестрэ, оркестрэу «Русская удалыр», эстрадэ купэу «Ошъутенэр», кIэлэцIыкIу ансамблэхэу «Мыекъуапэ инэфылъэхэр», «Казачатэр», «Сюрпризыр», Мыекъуапэ искусствэхэмкIэ икIэлэцIыкIу еджапIэу N 1-м зыщызыгъасэхэрэр, орэдыIохэу Нэгъой Маринэ, Елена Лепиховар, Къэлэкъутэкъо Мурат, Цышэ Зарэ, республикэм и Камернэ музыкальнэ театрэу А. Хьанэхъум ыцIэ зыхьырэм иартистхэр.

Республикэм ирайонхэм къарыкIыгъэ­хэ-ри ягуапэу мэфэкI концертым еплъыгъэх.

ЕмтIылъ Нурбый.