Мэлылъфэгъур имыкIызэ…

УФ-м хэбзэIахьхэмкIэ и Кодекс къызэрэщыдэлъытагъэмкIэ, икIыгъэ илъэсым хахъо зиIагъэхэм ар къэзыушыхьатырэ тхылъхэр (декларациехэр) къыкIэлъыкIорэ илъэсым иапэрэ мэзих имыкIызэ атынхэ фае. 2018-рэ илъэсымкIэ мыгъэ зытын фаехэм — мэлылъфэгъум и 30-м нэс.

ХэбзэIахьхэмкIэ федеральнэ къулыкъум и ГъэIорышIапIэу АР-м щыIэм тызэрэщигъэгъозагъэмкIэ, хахъоу фэ­хъугъэр къэзыгъэлъэгъон фаехэм ащыщых унэе предпринимательхэр, нотариусхэр, адвокатэу, Iоф зыщишIэщт кабинет зыгъэпсыгъэу ыкIи языгъэтхыгъэхэр. Джащ фэдэу амыгъэкIощырэ мылъкоу, илъэситф нахьыбэрэ ежь имыунэягъэр е автотранспортэу илъэсищ нахьыбэрэ ымыгъэфедагъэр 2018-рэ илъэсым зыщэжьыгъэхэм, имыIахьыл благъэ горэм тын лъапIэ къызэритыгъэхэм, IэкIыб къэрал къикIыгъэу хахъо зыгъотыгъэхэм, лотореер къизыхыгъэхэм, зимылъку бэджэндэу зытыгъэхэм декларациер хэбзэIахьхэмкIэ органхэм аIакIагъэхьан фаеу щыт.

Тхылъыр шIыкIэ гъэнэфагъэм диштэу тхыгъэуи яптын плъэкIыщт, фаем электроннэ шIыкIэр ыгъэфедэн амал иI. ХэбзэIахьхэмкIэ Федеральнэ къулыкъум иинтернет нэкIубгъо ит программэу «Декларация» зыфиIорэр ащкIэ IэпыIэгъу къыфэхъущт.

2019-рэ илъэсыр къызихьагъэм къыщыублагъэу физическэ лицэхэм хэбзэ­IахьхэмкIэ декларациехэр шIыкIэу 3-НДФЛ-мкIэ атых. Ащ иапэрэ нэкIубгъуищым ащыгъэнэфэгъэ пстэури шIокI имыIэу арыптхэн фае, адрэ нэкIубгъохэм ищыкIагъэ хъумэ ары.

Декларациемрэ хэбзэIахьхэмрэ игъом зымытыгъэхэм пшъэдэкIыжь зэрахьыщтым хэбзэIахьхэмкIэ къулыкъум къыщыкIагъэтхъыгъ. Декларацием пае игъом умытыгъэ хэбзэIахьым ипроцентитфым фэдиз тазырэу пIахыщт, НДФЛ-р зымытыгъэм процент 20 рагъэтыщт.

Кодексым цIыфым хэбзэIахьэу ытыгъэм щыщ къыригъэгъэзэжьын ылъэ­кIынэу (налоговый вычет) къыщыдэ­лъы­тагъ. ГущыIэм пае, фэтэр къыщэ­фы­гъэмэ, гъэсэныгъэм, ипсауныгъэ изэтегъэуцожьын, страхованием ахъщэ атыригъэкIодагъэмэ, хэбзэIахьэу ытырэм щыщ Iахь къыратыжьы. Ащ пае декларациер илъэсым къыкIоцI ежь зыщыфэе уахътэм ытын фит.

ХЪУТ Нэфсэт.