Москва щыIукIагъ

Урысые Федерацием и Федеральнэ ЗэIукIэ ФедерациемкIэ и Совет и Тхьаматэу Валентина Матвиенкэмрэ Ады­геим и ЛIышъхьэу КъумпIыл Муратрэ тыгъуасэ IофшIэгъу зэIукIэгъу Москва щызэдыря­I­агъ. Республикэм исоциальнэ-экономи­кэ хэхъоныгъэ иIофыгъохэм ыкIи федеральнэ гупчэм зэдэлэжьэныгъэу ащ ды­риIэщтым илъэ­ныкъохэм атегущыIагъэх.

Мы зэIукIэгъум хэлэжьагъэх Адыгеим ыцIэкIэ Парламентым иапшъэрэ палатэ хэтхэу Олег Селезневымрэ Хъопсэрыкъо Муратрэ.

Республикэм социальнэ-экономикэ хэхъоныгъэ шъхьаIэу ышIыгъэхэм, федеральнэ гупчэм иIэпыIэгъурэ ежь ышъхьэкIэ Валентина Матвиенкэм ишIуа­гъэу къыгъакIорэмрэ ялъытыгъэу мэхьанэшхо зиIэ проект заулэ зэшIохыгъэ зэрэхъу­гъэр ЛIышъхьэм къыхигъэщыгъ. Лъэпкъ проектхэм ягъэцэкIэн зэрэкIорэм анахьэу ынаIэ тыригъэтыгъ.

Валентина Матвиенкэм къызэриIуагъэмкIэ, ФедерациемкIэ Советым социальнэ мэхьанэ зиIэ пшъэрылъхэм язэ­шIохынкIэ тапэкIи республикэм ишIуагъэ къыригъэкIыщт.

Республикэм ынаIэ къызэрэтыригъэтырэм, мэхьанэшхо зиIэ пшъэрылъхэм язэшIохынкIэ къызэрэдеIэрэм апае Валентина Матвиенкэм зэрэфэразэр КъумпIыл Мурат къыхигъэщыгъ. Джащ фэдэу ФедерациемкIэ Советым и Тхьаматэ ар фэгушIуагъ Святой апостолэу Андрей Первозваннэм иорден ащ къызэрэфагъэшъошагъэм пае. Хэгъэгум иапшъэрэ тынхэм зыкIэ ащыщыр Урысые Федерацием и Президентэу Владимир Путиным жъоныгъуакIэм и 23-м Валентина Матвиенкэм къыритыжьыгъ Хэгъэ­гум ыпашъхьэ гъэхъэгъэ ин дэдэхэу щыриIэхэм апае.

Адыгэ Республикэм и ЛIышъхьэ ипресс-къулыкъу