Митинг-концертым хэлэжьэщтых

Къырым Урысыем зэрэхэхьажьырэм ехьылIэгъэ референдумыр зызэхащагъэр илъэси 5 зэрэхъурэр Пшызэ шъолъыр икъэзэкъыдзэ илIыкIо куп хэтхэу Мые­къопэ къэзэкъ отделым хэхьэрэ къэзэкъ 60-мэ мы хыгъэхъунэныкъом щыхагъэунэфыкIыщт.

Къырым щыпсэухэрэм, Пшызэ шъолъыр икъэзэкъыдзэ хэтхэм яатаманэу, къэзэкъ генералэу Николай Долуда япащэу, «Народному ополчению всех времен» зыфиIорэ саугъэтым непэ къэгъагъэхэр кIэлъыралъхьащтых, Симферополь иурам шъхьаIэхэм цIыфхэр гъэкIэрэкIагъэу къарыкIощтых. Сыхьатыр 10-м Къырым и Къэралыгъо Совет дэжь щыт пчэгум референдумыр зыщыIагъэр илъэси 5 зэрэхъурэм фэгъэхьыгъэ митинг-концерт щызэхащэщт.

Пшызэ шъолъыррэ Къырымрэ ащыпсэурэ къэзэкъхэр Александро-Невскэ чылысым тхьэ щелъэ­Iущтых. Джащ фэдэу ахэм Юрий Гагариным ыцIэкIэ щыт паркым концерт къыщатыщт, сэшхом игъэ­федэнкIэ яIэпэIэсэныгъэ къызыщагъэлъэгъощт зэ­нэкъо­къум хэлэжьэщтых, лъэпкъ шхы­ныгъохэр къэлэдэсхэм апагъо­хыщтых.

Шъугу къэтэгъэкIыжьы 2014-рэ илъэсым имэзае Мыекъопэ къэзэкъ отделым икъэзэкъи 170-рэ Пшызэ шъолъыр икъэзэкъыдзэ хэтхэу Къырымрэ къэлэ- лIыхъужъэу Севастопольрэ ащы­псэухэрэм IэпыIэгъу афэ­хъун­хэу зэрэкIогъагъэхэр. Мые­къуапэ идзэхэм пащэу джащыгъум яIагъэр отделым иатаманэу бэмышIэу хадзыгъэгъэ Александр Даниловыр ары. Къалэу Севастополь идзэ частхэр, идзэ радиотрансляционнэ станциер, идзэ къухьэхэм гъэстыныпхъэ зыщарагъэхъорэ базэхэм якъэ­дзыхьанкIэ къэзэкъхэм пшъэры­лъэу къафашIыгъагъэхэр тхьамэфитIум къыкIоцI еIолIэнчъэу агъэ­цэкIагъэх. Ахэм Украинэм идзэ къулыкъушIэхэм амал арагъэгъотыгъэп IашэкIэ мамыр цIыфхэр зэбгырафынхэу, Керчь хыдэкIыпIэр зэфэзышIынэу щытыгъэ къухьэхэм гъэстыныпхъэ­хэр арагъэхъонэу. Референдумыр зыщыкIощт мафэр къэблагъэ зэхъум къэзэкъхэм дзэ гражданскэ аэропортэу «Бельбек» къа­дзыхьэгъагъ, ащ иухъу­макIохэр аэропортым къыдафыгъагъэх, КъохьэпIэ Украинэм щыщ бандеровцэхэу референдумыр зэщызыгъакъо зышIоигъуа­гъэхэр зэрыс дзэ самолетхэр къырагъэ­тIысэхыгъагъэхэп. Къэ­зэкъхэм къалэу Севастополь ихэдзыпIэ участкэхэр зэлъыпы­тэу чэщ-мэфищэ къагъэгъунэгъагъэх.

Екатерина Загорулько.