МашIор щынэгъончъэныр

КIымафэр къызыскIэ, хьаку зэфэшъхьафхэмкIэ цIыфхэм яунэхэр агъэплъыхэу рагъажьэ. НахьыбэрэмкIэ машIом тэ­рэзэу зэрэдэмызекIохэрэр, шапхъэхэр зэраукъохэрэр ары ащ зыкъиштэныр къызхэкIырэр.

Ащ ыпкъ къикIыкIэ лъыплъэн IофшIэнымкIэ шъолъыр отделхэм яинспекторхэм чIылъэ унэ­хэр къакIухьэх, цIыфхэм гущы­Iэгъу афэхъух, машIор щынэгъончъэ­ным епхыгъэ шапхъэхэр зэрытхэгъэ тхьапэхэр афагощых.

Анахь къызэрыкIо зекIуа­кIэхэу жъугъэцэкIэнхэ фаехэр Урысыем ошIэ-дэмышIэ Iоф­хэмкIэ и Министерствэ и Гъэ­IорышIапIэу Адыгеим щыIэм шъугу къегъэкIыжьых:

— шъучъыенэу шъугъо­лъыжьы е унэм шъуикIы зы­хъукIэ электроприборхэр, хьакухэр шъууплъэкIух;

— электричествэр зэрыкIорэ линиехэм язытет шъу­лъыплъ, зэщыкъуагъэ иIэмэ, шъор-шъорэу шъумышIыжьэу специалистым зыфэжъугъаз;

— зэпымыоу хьакухэр ыкIи Iугъо икIыпIэхэр шъууплъэкIух;

— кIэлэцIыкIухэр язакъоу унэм къишъумыгъанэх.

Анахь шъхьаIэр — машIор къызыхъукIэ, шъукъэмыщтэу мэ­шIогъэкIосэ-къэгъэнэжьын къулыкъум шъуафытеу теле-фо­н номерэу «01-мкIэ» е «101-мкIэ», тэрэзэу адресыр яшъуIу. МашIор кIосэным фэIорышIэрэ амалхэр жъугъэфедэх, мыхъумэ — гъунэгъухэм шъукъядж ыкIи урамым шъутехь. Мылъкур къэжъугъэгъунэным шъупылъэу уахътэр шъумыгъакIоу, нэжъ-Iужъхэр, кIэлэцIыкIухэр унэм къишъущых, IэпыIэгъу ахэм шъуафэхъу. Къишъумыщышъугъэхэмэ, къэсыгъэ мэшIогъэкIуасэхэм а къэбарыр яжъугъашI.

НахьыбэрэмкIэ Iугъор ары цIыфхэр изытхьэлыхьэхэрэр. Арышъ, унэм шъукъызэрикIыщт гъогур машIом зэлъиубыты­гъэ­мэ, нэмыкI унэ чыжьэм зи­шъу­шIыхьэри, Iугъор къимыхьаным фэшI пчъэхэм хъэдэнхэр адэ­жъугъанэх. Шъхьаныгъупчъэхэр Iушъухыхэ хъущтэп. IэпыIэгъу зэрэшъуищыкIагъэр мэкъэ лъэш­кIэ зэхяжъугъэх.

Кушъу Рустам.

Мыекъуапэ ыкIи Мыекъопэ районым машIом лъыплъэ­гъэнымкIэ якъэралыгъо инспектор.