ЛIыхъужъхэм ягъогу рыкIощтых

Къыблэм самбэмкIэ изэнэкъокъу мэлылъфэгъум и 3 — 6-м Новороссийскэ щыкIуагъ. Илъэс 13 — 14 зыныбжь кIалэхэр, пшъашъэхэр апэрэ чIыпIэхэм афэбэнагъэх.

Адыгэ Республикэм ихэшыпыкIыгъэ командэ хэтхэу Кушъу Тамерлан, кг 38-рэ, Хьатхъохъу Рустам, кг 42-рэ, Бэгъушъэ Артур, кг 46-рэ, апэрэ чIыпIэхэр къыдахыгъэх. КIалэхэм япащэх тренерхэу Б. Шъэумэныр, А. Хьабэхъур. Тренерэу А. Гъомлэшкым ыгъэсэрэ ЛIыхъурэе Мурат, кг 38-рэ, ятIонэрэ чIыпIэр къыфа­гъэшъошагъ.

Тыгъужъ Тимур, кг 35-рэ, Эдуард Варельджан, кг 42-рэ, Мэ­лы­щэ Аскэр, кг 71-м къехъу, Мамхъо Астемир, кг 71-м къехъу, ящэнэрэ чIыпIэхэр къахьыгъэх. Тренерхэу А. Хьабэхъум, Д. Хьа­ку­рынэм, З. Ацумыжъым, Ш. На­щэм бэнакIохэр агъасэх.

— ЖъоныгъуакIэм и 27-м Урысыем иныбжьыкIэхэм якIэух зэнэкъокъу Новороссийскэ щыра­гъэжьэщт, — къытиIуагъ респуб­ликэм самбэмкIэ испорт еджапIэ ипащэу Делэкъо Адамэ. — Адыге­им щапIугъэ нэбгыри 6 алырэ­гъум щыбэнэщт. Зэнэкъокъум зэрэхэлэжьэщтхэм дакIоу, лIыхъужъ ыкIи лэжьэкIо щытхъум япхыгъэ чIыпIэ­хэу Новороссийскэ иIэхэр ти­спортсменхэм зэрагъэлъэгъущтых.

Хэгъэгу зэошхом илъэхъан Адыгеим щыщ нэбгырабэ Но­вороссийскэ икъэухъумэн хэлэ­жьагъ. Тятэжъ пIашъэхэм лIыгъэу зэрахьагъэм ныбжьыкIэхэм зыщагъэгъозэщт къодыеп, заом имашIо хэтыгъэхэ дзэкIолIхэм лIыгъэ зыщызэрахьагъэ гъогухэм арыкIощтых.
Сурэтым итхэр: зэнэкъокъум хэлэжьагъэхэр.

 ЕМТIЫЛЪ Нурбый.