Лъэхъаным диштэхэрэ шIыкIэхэр агъэфедэхэзэ

Мэкъумэщ хъызмэтшIапIэу «Мускат» зыфиIорэр садлэжьыным пылъ анахь хъызмэтшIэпIэ инэу республикэм итхэм ащыщ. Мыекъопэ районыр ары зыщагъэпсыгъэр. ПстэумкIи гектар 340-м ехъурэмэ мыIэрысэ лъэпкъ зэфэшъхьаф 20 фэдиз къащагъэкIы. Ар зэкIэмкIи чъыг мин 300 фэдиз мэхъу. Ахэм янахьыбэр кIымафэми пхъэшъхьэ-мышъхьэ къэзытыхэрэ лъэпкъых.

БлэкIыгъэ 2018-рэ илъэсым мы хъызмэтшIапIэм пхъэ­шъхьэ-мышъхьэхэр щаIыгъынхэу тонн мини 10 фэдизым телъытагъэу гъэтIылъыпIэ щашIыгъ. Пхъэ­шъхьэ-мышъхьэхэм яIыгъынкIэ лъэхъаным къыздихьыгъэ шIыкIэ зэфэшъхьафхэр щагъэфе­дэнхэ алъэкIыным ар тегъэ­псыхьагъ, псэолъэ анахь дэ­гъухэр чIагъэуцуагъэх. Садхэм IофшIэнхэм янахьыбэр IэкIэ ащызэшIуахымэ, цехэу пхъэ­шъхьэ-мышъхьэхэр зыщызэха­дзыхэрэм зы сыхьатым тонн 12 къыдэкIыным тегъэпсыхьэгъэ оборудование щагъэуцугъ.

ГъэтIылъыпIэр аухи затIупщым АР-м и ЛIышъхьэ мы хъызмэтшIапIэм кIогъагъэ. Зызэраушъомбгъурэм, лъэхъаным диштэу Iоф ашIэным зэрэфэбанэхэрэм, цIыфхэу щылажьэ­хэрэм IофшIэкIэ амалышIухэр зэраратыхэрэм ащ осэ ин афи­шIыгъагъ, ащ фэдэ хъызмэтшIапIэхэр IэпыIэгъунчъэу къызэрэмынэщтхэри кIигъэтхъыгъагъ. Арэу щытми, къуаджэм щы­псэухэрэм ящыIакIэ нахьышIу хъуныр республикэм ипащэ анахь шъхьаIэ ышIыхэрэм зэращыщым ишыхьатэу, Iоф щызышIэхэрэм ялэжьапкIэ джыри къафиIэтынэу хъызмэтшIапIэм ипащэ риIогъагъ.

Пстэумэ апэу къыхэдгъэ­щымэ тшIоигъор хъызмэтшIапIэр IэпыIэгъунчъэу къызэрэ­мына­гъэр ары. Пхъэшъхьэ-мышъхьэ­хэр зыщиIыгъынхэу ыгъэуцугъэм тыригъэкIодэгъэ мылъкум щыщ Iахьым къэ-ра­лыгъом къыфыригъэгъэзэжьыгъ. Ежь «Мускатым» ипащи унашъоу фа­шIыгъэр охътэ кIэкIым къыкIоцI ыгъэцэкIагъ. Нэбгыри 100-мэ ащ IофшIэпIэ чIыпIэхэр къаретых. Ахэм зэкIэми, хэзыгъэ имыIэу, ялэ­жьапкIэ къафыхи­гъэхъуагъ. Ау ащ ежь иунэе мылъку пэIуи­гъэхьагъэр.

Мы хъызмэтшIапIэм тонн ми­ни 6-м къыщымыкIэу илъэс къэс мыIэрысэ къыщаугъои. Къыблэ шъолъырым къыщегъэ­жьагъэу КъохьэпIэ Чыжьэм нэ­сыжьэу япхъэшъхьэ-мы­шъхьэхэр ащыIуагъэкIых. Шъып­­къэ, мыгъэ сатыум уигъэрэзэн дэдэу зэрэщымытыр хъызмэтшIапIэм ипащэ къыхигъэщыгъ. МыIэрысэ тонн мини 4 фэдиз джыри IуамыгъэкIыгъэу ягъэтIылъыпIэхэм ачIэлъ. Арэу щы­тми, ащ агу ыгъэкIодэу яIоф­шIэн къызэтырагъэуцуагъэп. Мы­Iэрысэ бэгъуагъэ къахьыжьыным пае чъыг пэпчъ хэушъхьафыкIыгъэу ешIушIэх. Мы уахътэм етIупщыгъэу чIыгъэшIухэр аратых, апэупкIыхьэх. Сатыур зэтеуцожьынышъ, ямыIэрысэхэм джыри нахьыбэу федэ къа­хьыным щэгугъых.

ХЪУТ Нэфсэт.