Лъэпкъ проектхэм ягъэцэкIэн лъыплъэщтых

ЦIыфхэм ящыIэкIэ-псэукIэ зэрэзэблэхъурэм ылъэныкъокIэ жъоныгъокIэ унэшъуакIэр гъэцэкIагъэ зэрэхъурэм ОНФ-м уасэ фишIынэу УФ-м и Президент пшъэрылъ къыгъэуцугъ.

Чъэпыогъум и 24-м стратегическэ хэхъоныгъэхэм ыкIи лъэпкъ проектхэм афэгъэзэгъэ Советэу УФ-м и Президент дэжь щыIэм иапэрэ зэхэсыгъо щыIагъ. Ащ лъэпкъ проект ыкIи программэ 12-мэ щахэплъагъэх. Советым хэхьэ Урысые народнэ фронтым игъэцэкIэкIо комитет ипащэу Алексей Анисимовыр.

Лъэпкъ проектхэр цIыфхэм къызэрагурыIохэрэм, ахэр щыIэныгъэм щыпхырыщыгъэхэ зэрэхъурэм ОНФ-м илIыкIохэр тапэкIи лъыплъэнхэу къэралыгъом ипащэ пшъэрылъ къафишIыгъ.

— Граждан лъыплъэным ылъэныкъокIэ опытэу щыIэр гъэфедэгъэным мэхьанэшхо зэриIэр къыдалъытэзэ, ОНФ-м иактивистхэм, иэкспертхэм япшъэрылъхэр щытхъу хэлъэу зэрагъэцакIэрэр тапэкIи лъагъэ­кIотэнэу сыкъяджэ, — къыIуагъ Владимир Путиным.

УФ-м и Президент ижъоныгъокIэ унэшъуакIэу 2018-рэ илъэсым къыдэкIыгъэм илъэныкъо шъхьаIэхэм афытегъэ­псы­хьэгъэ лъэпкъ проектхэм язэхэгъэуцон зэраухыгъэр Урысыем и Правительствэ къыщаIуагъ. Ащ къыкIэлъыкIощт едзыгъом проектхэм ягъэцэкIэн фежьэщтых, ахэр зэшIохыгъэ зэрэ­хъухэрэм лъыплъэщтых.

Лъэпкъ проектхэм ягъэцэкIэн лъыплъэгъэныр «гъогу картэхэм» къадыхэлъытагъ, ащкIэ Народнэ фронтым анахьэу ынаIэ зытыри­гъэтыщтхэ лъэныкъохэр ОНФ-м изэфэсэу шэкIогъум щыIэщтым экспертхэм къыщагъэлъэгъощтых.

Шъугу къэдгъэкIыжьын мы илъэсым жъоныгъуакIэм лъэпкъ проектхэм ыкIи программэхэм адиштэрэ тематическэ площадкэ 12 Народнэ фронтым зэригъэпсыгъэр. УФ-м и Президент къыгъэуцугъэхэ пшъэрылъ шъхьа­Iэхэр гъэцэкIэгъэнхэмкIэ предложениеу щыIэхэм ОНФ-м Iоф адешIэ. ТапэкIи ар лъа­гъэкIотэщт, цIыфхэм щыIэкIэ-псэукIэ амалхэу яIэхэр нахьышIу шIыгъэнхэм фытегъэпсыхьэгъэ жъоныгъокIэ унашъом илъэныкъо шъхьаIэхэр зэшIохыгъэхэ зэрэхъурэм лъыплъэщтых.

(Тикорр.).