Лъэпкъ быракъым рэгушхох

Адыгэ быракъыр зыкIыныгъэм ыкIи хэгъэгу шIулъэгъум ятамыгъэу щыт. Черкес лъэпкъ 12-мэ яжъуагъохэр быракъым тетых, адрэ щэбзищыр — адыгэ лъэпкъыр егъашIи зыфэбэнэгъэ мамырныгъэм итамыгъ.

Быракъ уцышъор гъатхэм инэпэеплъ. Хьаулыеу адыгэхэм аIощтыгъэп: «Щагур шхъуантIэу, уцыр къашхъоу».

Хэбзэ дахэ зэрэтфэхъугъэу, илъэс къэс, адыгэ быракъым и Мафэ Фэдз гурыт еджапIэу N 11-м щыхэтэгъэунэфыкIы. Мы мэфэкI дахэм фэгъэхьыгъэу класснэ урокхэр, зэдэгущыIэгъухэр, нэмыкI Iофтхьабзэхэри кIэлэеджакIохэм афызэхэтщагъэх. Классыр дахэу дгъэкIэракIи, кIэлэеджакIохэм лъэпкъ шъуашэхэр ащыгъхэу, адыгэ быракъхэр аIыгъхэу зэхахьэм ягуапэу хэлэжьагъэх. Адыгэ быракъым къэбарэу пылъым имызакъоу, тилъэпкъ итарихъ, укъызщыхъугъэ чIыпIэр шIу плъэгъун, ащ уасэ фэпшIын зэрэфаер кIэлэеджакIохэм къаIотагъ. Бзэр, культурэр, шэн-хабзэхэр нахьыжъхэм зэрамыгъэкIодыгъэхэм, къызэраухъумагъэхэм зэрэрыгушхохэр кIэлэцIыкIухэм къаIуагъ. Ежьхэми а шэн шIагъор тапэкIэ зэрэлъагъэкIотэщтыр къыраIотыкIыгъ.

Ащ нэмыкIэу адыгэ быракъым фэгъэхьыгъэ усэхэм кIэлэеджакIохэр къяджагъэх, ижъырэ адыгэ орэдхэр къаIуагъэх, къэшъуагъэх. Iофтхьабзэр адыгэ джэгукIэ тыухыгъэ.

КIЭРЭФ Марет.

Я 5-рэ классым икIэлэегъадж.

Сурэтым итхэр: Я 5-рэ классым икIэлэеджакIохэу адыгэ быракъым имэфэкI чанэу хэлэжьэгъэхэ А. Алъэскырыр, А. Жьэкъщэкъулыр, И. АфэшIагъор, А. Къурщэр, И. ЦукIыр.