Лъэпкъым ипшъэрылъын

Адыгабзэм и Мафэ ихэгъэунэфыкIын къыдыхэлъытагъэу, непэ Адыгэ Лъэпкъ театрэу Цэй Ибрахьимэ ыцIэ зыхьырэм къэгъэлъэгъон гъэшIэгъон щыкIощт — ныбжьыкIэ театральнэ купэу «Щыгъыжъыем» адыгэм идунай пчыхьэм сыхьатыр блым ыныкъом пстэури регъэблагъэ.

Купым нэбгырэ 20 хэт, Адыгэ Республикэм инароднэ, Урысые Федерацием изаслуженнэ артисткэу Уджыхъу Марет ипащ. 2008-рэ илъэсым Маретрэ IэкIыбым къикIыжьыгъэ тилъэпкъэгъухэмрэ ягукъэкIкIэ «Щыгъыжъыер» зэхащагъ. Апэ нэбгыри 6 фэдиз къакIощтыгъэр. Илъэси 5 — 6 аныбжьыгъэр. Ахэр джы къызнэсыгъэми купым хэтых: Беданэкъо Тембот, Нэрыс Кайхан, ХыдзэлI Псэзан, Гунэс Хатам, Бэчыжъ Алый, Цопсынэ Эльбруз. Аужырэ мэзиплIым джыри нэбгыри 10 къахэхьагъ. Мыекъуапэ имызакъоу къуаджэхэми къарыкIхэу мэхъу. Джащ фэдэу Блэгъожъ Астемир Пэнэжьыкъуае, Уджыхъу Миланэ Джэджэхьаблэ къарыкIыхэзэ къэгъэлъэгъон цIыкIухэм якъэшIын зыфагъасэ, яадыгабзэ апсыхьэ.

«Щыгъыжъыем» къышIырэ къэгъэлъэгъонхэм ясценарийхэр Уджыхъу Марет етхых, ащкIэ егъэфедэх нарт эпосым къыхэхыгъэхэр. ГущыIэм пае, «Сэтэнаерэ Орзэмэджрэ япщыналъэ», «Лъэпшъ игъупчъэ» адыгэ артист цIыкIухэм къашIы. Лъэпкъым ишэн-зэхэтыкIэхэри игъэкIотыгъэу зэрагъашIэ, къагъэлъагъох — нысащэр, нысэищыр, лъэтегъэуцор, кушъэхапхэр, нэмыкIхэри. Адыгэ усэхэм къяджэх, урыс пшысэхэр адыгабзэкIэ зэдзэкIыгъэхэу къагъэлъагъох.

Лъэпкъ мэфэкI пэпчъ «Щыгъыжъыер» хэлажьэ, бзэм, адыгэ культурэм ядэхагъэ егъэбагъо. Къыхэгъэщыгъэн фае, Адыгеим имызакъоу, ткъош республикэхэми, IэкIыбыми мы ныбжьыкIэ купыр ащызэлъашIагъ — икIыгъэ илъэсым Къэбэртэе-Бэлъкъар Республикэм, Тыркуем икъалэхэу Истамбыл, Анкара, Дюзджэ къуаджэхэм ащыIагъэх. Мы мазэм и 17-м адыгабзэм и Мафэ фэгъэхьыгъэ зэхахьэу Истамбыл тилъэпкъэгъухэм щызэхащэщтми мы купым илIыкIохэр хэлэжьэщтых.

КIэлэцIыкIухэм лъэшэу агу рихьэу загъэсэнэу мыщ къэкIох, сыда зыпIокIэ къапэблэгъэ джэгукIэ шъуашэр Марет егъэфедэ, ащ бзэм изэгъэшIэн нахь къегъэпсынкIэ. ЗыкъаIэтымэ, артист хъунэу фаехэри ныбжьыкIэхэм ахэтых.

Щыгъыжъые пэпчъ щыгъыжъыцэм къегъэпсы. Джащ фэдэу щыгъыжъыцэу ащ хэлъыр нахьыбэ хъуныр, адыгабзэм тапэкIи зырагъэушъомбгъуныр игугъапIэу мы цIэр фиуси, купыр Марет зэхищагъ, адыгабзэр, адыгэ шэн-хабзэхэр ясабыйхэм ашIэ зышIоигъо пстэуми къащэхэрэр ыпкIэ хэмылъэу егъасэх. Мыхэм афэдэхэр нахьыбэ хъухэ къэс тилъэпкъ иныдэлъфыбзэ чIинэным ищынагъо шъхьащытыщтэп.

Шъуеблагъ непэрэ пчыхьэзэхахьэм — бэ гъэшIэгъонэу, шъугу къыIэтынэу щышъулъэгъущтыр! Еплъы зышIоигъо пстэури ыпкIэ хэмылъэу чIэхьан ылъэкIыщт.