Лъэпкъхэм языкIыныгъэ имэфэкI

Зэкъошныгъэм ипчэгоу Мыекъуапэ дэтым хэгъэгум щыпсэурэ лъэпкъхэм языкIыныгъэ и Мафэ фэгъэхьыгъэ зэхахьэ щыкIуагъ.

МэфэкI Iофтхьабзэм хэлэжьагъэх Адыгэ Республикэм и ЛIышъхьэу КъумпIыл Мурат, республикэм и Парламент и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Адыгеим и Правительствэ икъулыкъушIэхэр, республикэ парламентым идепутатхэр, общественнэ движениехэм ахэтхэр, дин зэфэшъхьафхэр зылэжьыхэрэр, культурэм, гъэсэныгъэм, спортым яIофышIэхэр, ныбжьыкIэхэр, республикэм ихьакIэхэр.

Адыгэ Республикэм и ЛIышъхьэу КъумпIыл Мурат мэфэкI зэхахьэм къыщыгущыIагъ. Ащ зэрэхигъэунэфыкIыгъэу, хэгъэгум ис лъэпкъхэр мэфэкIым зэфищагъэх. ЛIэужхэм язэпхыныгъэ гъэпытэгъэнымкIэ, шIэжь яIэу ныбжьыкIэхэр пIугъэнхэмкIэ мэфэкI зэхахьэхэм ямэхьанэ зыкъеIэты.

— Тызэкъотмэ – ты­лъэш, — къыIуагъ КъумпIыл Мурат. — Экономикэм, социальнэ Iофыгъохэм хэхъоныгъэ ашIынымкIэ, цIыфхэм ящыIакIэ нахьышIу шIыгъэнымкIэ зыкIыныгъэ тхэлъэу тызэрэзэдэпсэурэм шIуагъэ къеты. Республикэм ис цIыфхэм гуетыныгъэу IофшIэным фыряIэм, мурад хэхыгъэхэу зэрэпсэухэрэм яшIуа­гъэкIэ ягухэлъышIухэм афэкIонхэ алъэкIыщт.

Парламентым и Тхьаматэу Владимир Нарожнэр, Урысыем иныбжьыкIэхэм я Союз икъутамэу Адыгэ Республикэм щыIэм ипащэу Виктория Комаровар, Адыгэ къэралыгъо университетым щеджэрэ Андыр­хъое Тамерлан мэфэкI зэхахьэм къыщыгущыIагъэх.

Ти ЛIышъхьэу КъумпIыл Мурат, Владимир Нарожнэр, нэмыкI хэбзэ къулыкъушIэхэр мэфэкI концертым еплъыгъэх. Адыгэ къашъоу «Уджым» зэха­хьэм хэлажьэхэрэр къыщы­шъуа­гъэх. Пчэгум къихьагъэх КъумпIыл Мурат, Владимир Нарожнэр, фэшъхьаф хэбзэ къулыкъу­шIэхэр, ныбжьыкIэхэр. АIапэхэр зэрэIыгъэу урысхэр, адыгэхэр, ермэлхэр, урымхэр, къэндзал­хэр, таджикхэр, туркменхэр, тыркухэр, IэкIыб къэралхэм къарыкIыжьыгъэ тилъэпкъэгъу­хэр, Дунэе фестивалэу «Этномодэм» хэлэжьагъэхэр, нэмыкI­хэри Зэкъошныгъэм ипчэгу щызэдэуджыгъэх.

КъумпIыл Мурат республикэм иобщественнэ движениехэм япащэхэу ЛIымыщэкъо Рэмэзан, Александр Даниловым, Алям Ильясовым, Аристотель Спировым, нэмыкIхэм гущыIэгъу афэ­хъугъ.

Общественнэ движениехэм, культурэм иIофышIэхэм якъэгъэлъэгъонхэм КъумпIыл Мурат, Парламентым, Правительствэм якъулыкъушIэхэр яплъыгъэх, лъэпкъхэм яIэпэIасэхэм гущыIэгъу афэхъугъэх. Гостэкъо Руслъан, Исаева Анжелэ, Цурмыт Рузанэ, Нэгъуцу Аслъан, фэшъхьафхэм яIэшIагъэхэр цIыфхэм ашIогъэшIэгъоныгъэх.

Концертыр

Дунаим щызэлъашIэрэ ансамблэу «Ислъамыер», эстрадэ купэу «Ошъутенэр», IофшIапIэу «Ошъадэр», орэдыIохэу Даутэ Сусанэ, Цышэ Зарет, Еутых Вячеслав, Сергей Трутневыр, ансамблэхэу «Мыекъуапэ инэфылъэхэр», «Казачатэр», искусствэхэмкIэ кIэлэцIыкIу еджа­пIэхэм якупхэр, пщынаоу Гъу­кIэлI Батыр, нэмыкIхэри мэфэкI концертым хэлэжьагъэх. Оркестрэу «Русская удалым», ащ иорэдыIоу Анастасия Истамуловам, Адыгэ Республикэм и Къэралыгъо филармоние икIэлэцIыкIу театрэу «Дышъэ къошыным», фэшъхьафхэм мэфэкI зэхахьэр къагъэдэхагъ. Концертыр адыгабзэкIи, урысыбзэкIи зезыщагъэхэ Ахэджэго Рузанэрэ Мэкъулэ Руслъанрэ гущыIэ фабэхэр зэхахьэм къыщаIуа­гъэх. Республикэм, Урысыем ащыпсэухэрэ лъэпкъхэм щыIэкIэ дахэ яIэнэу, зэгурыIоныгъэу, шъхьэкIэфэныгъэу азыфагу илъым заушъомбгъунэу, мамыр псэукIэм зиIэтынэу афаIуагъ.

ЕмтIылъ Нурбый.