Лъэмыджым игъэцэкIэжьын лъагъэкIуатэ

Адыгэ Республикэм и ЛIышъхьэ ипшъэрылъхэр пIэ­лъэ гъэнэфагъэкIэ зыгъэцэкIэрэ КъумпIыл Мурат гъэцэ­кIэ­жьынхэр зэрашIылIэрэ «Шовгеновскэ лъэмыджкIэ» заджэхэрэ объектым тыгъуасэ щыIагъ.

IофшIэнхэр зэрэзэхащэрэм, пшъэрылъхэр гъэцэкIагъэхэ зэ­рэхъурэм защигъэгъозагъ, анахьэу анаIэ зытырагъэтын фэе лъэныкъохэр псэолъэшIхэм афигъэнэфагъэх. Ащ игъусагъэх УФ-м и Федеральнэ ЗэIукIэ ФедерациемкIэ и Совет ­хэтэу Хъопсэрыкъо Мурат, республикэм ивице-премьерэу Сапый Вячеслав, Мыекъуапэ имэрэу Александр Наролиныр.

Шъугу къэдгъэкIыжьын, метрэ 480-рэ зикIыхьэгъэ псэуа­лъэм изэтегъэпсыхьан 2016-рэ илъэсым шэкIогъум рагъэ­жьагъ. ПсэолъэшI IофшIэнхэр зыгъэцакIэрэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «БалтСтройСервис» зыфиIорэр ары. ИлъэсипшI пчъагъэ хъугъэу агъэфедэрэ лъэмыджым изытет дэй дэдэ хъугъагъэ. Ащ къыхэкIыкIэ, республикэм ипащэхэм ар зэтырагъэпсыхьанэу унашъо ашIыгъ. ЗэкIэмкIи ащ сомэ миллиони 143,1-м ехъу пэIуагъэхьащт. Непэрэ мафэм ехъулIэу сомэ миллион 27,6-рэ агъэфедагъ. Ащ къыдыхэлъытагъэу лъэмыджыр зы­Iыгъ пкъыгъо шъхьаIэхэр агъэ­пытагъэх, нэмыкI IофшIэнхэр рагъэкIокIыгъэх. Джащ фэдэу аужырэ шапхъэхэм адиштэрэ псэолъапхъэхэр агъэфедэхэзэ лъэмыджым телъ асфальтыр зэблахъущт, лъэсрыкIо гъо­гур зэтырагъэпсыхьащт, мы чIы­пIэр къэзыгъэнэфыщт пкъы­гъохэр бэу агъэуцущтых, нэ­мыкI гухэлъэу щыIэри макIэп. Мы аужырэ илъэсхэм тикъэлэ шъхьаIэ дэт автомобильхэм япчъагъэ хэпшIыкIэу нахьыбэ хъугъэ, ащ дакIоу мы лъэмыджым рычъэрэ авто­транспортми хэхъуагъ, арышъ, мыщ изэтегъэпсыхьан мэхьанэшхо иIэ мэхъу.

ПсэолъэшI IофшIэнхэр зы­гъэ­цэкIэрэ компаниер сменитIоу мэлажьэ, апэрэм — нэ­бгырэ 36 — 40, чэщым те­лъытэгъэ ятIонэрэ сменэм — нэбыгыри 7 — 9 къыдэкIых. ЗэрагъэнэфагъэмкIэ, мы илъэ­сым шышъхьэIум и 31-м ехъу­лIэу объектыр атын фае.

АР-м и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэр псэолъэшIхэм гущыIэгъу афэхъугъ, ежь зыщимыгъэрэзэрэ чIыпIэхэр къыхигъэщыгъэх, ахэр псынкIэу да­гъэзыжьынхэу, IофшIэныр агъэ­лъэшынэу афигъэпытагъ.

— Пшъэрылъ шъхьаIэр лъэмыджым игъэцэкIэжьын пэIу­хьащт сомэ миллиони 143,1-р шIуагъэ къытэу гъэфедэгъэныр ары. Тэ талъэныкъокIэ къыттефэрэр зэкIэ тэгъэцакIэ, псэо­лъэшI организациеми ащ фэдэ фыщытыкIэ къытфыриIэнэу тыщэгугъы. ШышъхьэIум и 31-м ехъулIэу аужырэ шапхъэхэм адиштэрэ объектыр ти­Iэн фае. ГумэкIыгъоу къэуцухэрэр къэшъуIэтых, тащыжъу­гъэгъуаз, амалэу щыIэмкIэ Iэ­пыIэгъу тышъуфэхъущт. Ау, цIыф­хэм апашъхьэкIэ пшъэдэ­кIыжьышхо зэрэшъухьырэр зыщышъумгъэгъупш. ИщыкIагъэмэ, IофшIэнхэр зыгъэцэкIэрэ цIыфхэм япчъагъэ хэжъугъахъу, ау уахътэу дгъэнэфа­гъэм ехъулIэу лъэмыджыр ттын фае, — къыIуагъ КъумпIыл Мурат.

Мыекъуапэ республикэм икъэ­лэ шъхьаIэу зэрэщытыр къы­далъытэзэ ащ изэтегъэ­псыхьан мэхьанэшхо зэрэратырэр къыIуагъ АР-м и ЛIы­шъхьэ ипшъэрылъхэр пIэлъэ гъэнэфагъэкIэ зыгъэцакIэрэм. Мы илъэсым телъытагъэу ыпшъэ­кIэ зигугъу къэтшIыгъэ лъэмыджым игъэцэкIэжьын пэ­Iухьащт сомэ миллиони 137-м ехъу, гъогухэм язэте­гъэ­псыхьан сомэ миллион 200, фэтэрыбэу зэхэт унэхэм ящагухэр шэпхъэшIухэм адиштэнхэм сомэ миллиони 100 ыкIи лъэсрыкIо гъогухэм язэтегъэпсыхьан сомэ миллиони 10 фэдиз республикэм апэIуигъэхьащт.

Мы объектым ыуж гъэцэ­кIэжьынхэр зыщыкIорэ гъогухэм ащыщ горэм КъумпIыл Мурат екIолIагъ, Iофхэм язытет зыщигъэгъозагъ.

— Аужырэ шапхъэхэм ади­штэрэ гъогухэр, лъэмыджхэр тиIэнхэм амалэу тиIэр зэкIэ етхьылIэщт. Мыщ фэдэ екIо­лIакIэм ишIуагъэкIэ тигъогухэм къатехъухьэрэ хъугъэ-шIа­гъэхэм япчъагъэ нахь макIэ тшIын, цIыфхэм ящынэгъончъа­гъэ къэтыухъумэн тлъэкIынэу тыщэгугъы. Iофэу тшIэрэр обществэм ылъэгъун, ащ осэ гъэ­нэфагъэ къыфишIын фае, — къыIуагъ кIэух зэфэхьысыжьхэр къышIызэ КъумпIыл Муратэ.

ТХЬАРКЪОХЪО Адам.

Сурэтхэр А. Гусевым тыри­хыгъэх.