ЛъэгапIэхэм афэкIох

Адыгэ Республикэм дзюдомкIэ испорт еджапIэ зыщызыгъасэхэрэр зэнэкъокъу зэфэшъхьафхэм ахэлажьэх, хагъэунэфыкIырэ чIыпIэхэр къащыдахых.Къыблэм дзюдомкIэ изэIукIэгъухэу Мыекъуапэ джырэблагъэ щыкIуагъэхэм илъэс 23-м нэс зыныбжьхэм яIэпэIэсэныгъэ къащагъэлъэгъуагъ.

Ордэн Заур, килограмм 81-рэ, дышъэр зэнэкъокъум къыщыдихыгъ. Адыгэ Республикэм изаслуженнэ тренерэу Беданыкъо Рэмэзан ыгъэсэрэ батырым икъулай хэпшIыкIэу хегъахъо.

Щыгъущэ Амир, кг 73-рэ, Къуижъ Бислъан, кг 73-рэ, джэрз медальхэр къафагъэшъошагъэх. Б. Къуижъым Урысыем изаслуженнэ тренерэу Беданыкъо Байзэт ипащэу дзюдомкIэ мэбанэ.

Щыгъущэ Амир ныбжьыкIэхэм язэIукIэгъоу Европэм щыкIуагъэм Урысыем ихэшыпыкIыгъэ командэ хэтэу хэлажьи, джэрзыр къыхьыгъ. Урысыем изэIукIэгъухэм тыжьыныр, джэрзыр къащыдихыгъ. БэнакIор тренерэу Роман Оробцовым егъасэ.

— ХагъэунэфыкIырэ чIыпIэхэр Мыекъуапэ къыщыдэзыхыгъэхэр Урысыем икIэух зэIукIэгъу хэлэжьэщтых, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэкIэ щытым ипащэу, спортымкIэ дунэе класс зиIэ мастерэу КIуае Хьазрэт. – Къыблэм изэIукIэгъухэу Мыекъуапэ щыкIуагъэхэм тиныбжьыкIэхэр чанэу ахэлэжьагъэх. ЯIэпэIэсэныгъэ зыкъызэриIэтырэр зэнэкъокъум къыщылъэгъуагъ.

Сурэтым итхэр: Ордэн Заур, Щыгъущэ Амир, Къуижъ Бислъан.