КIэлэцIыкIухэм япсауныгъэ пстэуми анахь лъапI

АР-м и ЛIышъхьэу КъумпIыл Мурат Адыгэ республикэ клиническэ кIэлэцIыкIу сымэджэщым тыгъуасэ щыIагъ, ащ изытет зэригъэлъэгъугъ, сымаджэу чIэлъхэм гущыIэгъу афэхъугъ. Iофтхьабзэм къыдыхэлъытагъэу, волонтер движением Адыгеим хэхъоныгъэхэр зэрэщишIырэм зыщигъэгъозагъ, волонтер-медикхэм заIуигъэкIагъ.

Iофтхьабзэм хэлэжьагъэх Адыгэ Рес­публикэм и Къэралыгъо Совет — Хасэм и Тхьаматэу Владимир Нарожнэр, АР-м псауныгъэр къэухъумэгъэнымкIэ иминистрэу Мэрэтыкъо Рустем.

Адыгеим волонтер движениеу «Здоровый образ жизни. Наше будущее —завтра» зыфиIорэр щагъэцакIэ. Волонтер-медикэу республикэм нэбгырэ 300-м ехъу ис. Ахэр Урысые Iофтхьабзэхэу зэхащэхэрэм чанэу ахэлажьэх, ежьхэри кIэщакIо зыфэхъухэрэ Iофтхьабзэхэри тишъолъыр щырагъэкIокIых. ГущыIэм пае, «Добро в село» зыфиIорэр Адыгеим иволонтерхэм ягукъэкIкIэ зэхащагъ, нэужым Iофтхьабзэм Урысыем зыщиушъомбгъугъ. «Волонтеры — детям» зыфиIорэм къыдыхэлъытагъэу сымэджэщым чIэлъхэ кIэлэцIыкIухэм IэпыIэгъу афэхъух, яуахътэ гъэшIэгъонэу агъэкIоным пылъых. Iофтхьэбзэ зэфэшъхьафхэр къафаугупшысых, сымэджэщым чIэфагъэхэ кIэлэцIыкIухэр агъэчэфых. Волонтерхэм шIуагъэу къахьырэр гъунэнчъ, сыда пIомэ медицинэм иIофышIэхэм IэпыIэгъу зэрафэхъухэрэм дакIоу сабыйхэми ягукъэIэтыпIэх.

КъумпIыл Мурат травматологие ыкIи реабилитационнэ отделениехэу сымэ­джэщым хэтхэр къыплъыхьагъэх, ахэм ачIэлъ кIэлэцIыкIухэм гущыIэгъу афэ­хъугъ. Травматологием иотделение мэ­къуогъум гъэцэкIэжьынхэр щашIыгъэх, мебелыр щызэблахъугъ. Нэбгырэ 31-рэ чIэлъыным фытегъэпсыхьагъэхэ чIыпIэхэр иIэх. КъумпIыл Мурат иунашъокIэ къэзыгъэучъыIыщт сплит-системэхэр сымэджэщым чIагъэуцуагъэх.

Реабилитационнэ отделениер сэкъатныгъэ зиIэхэ сабыйхэми ащяIэзэнхэм фытегъэпсыхьагъ. Мыщ массаж зыща­шIыщт, зыщыджэгущтхэ, нэмыкI кабинетхэри хэтых. Медицинэм иофышIэхэм къы­зэраIуагъэмкIэ, гъэмэфэ зыгъэпсэфыгъом кIэлэцIыкIухэм шъобжхэр проценти 10-кIэ нахьыбэу атещагъэхэ мэхъу. Сымэджэщым зэкIэ чIэлъхэм респуб­ликэм ипащэ якIолIагъ, гущыIэгъу афэ­хъугъ. ИмэфэкI мафэ сымэджэщым чIэлъэу къизыгъэхьэгъэ Шэуджэн Каринэ мэфэкIыр пытэу ыгу къинэжьыщт. Пшъэ­шъэжъыем КъумпIыл Мурат фэгу­шIуагъ ыкIи шIухьафтын ритыгъ. Илъэси 9 хъу­гъэ Каринэ цIыкIур чъыгым къефэхыгъ ыкIи ылъакъо зэпикIыгъ.


Нэужым кIэлэцIыкIу сымэджэщым Iоф щызышIэхэрэм КъумпIыл Мурат гущыIэгъу афэхъугъ.

— Шъолъыр медицинэр нахь дэгъу зэрэхъущтым тыпылъ. Лъэпкъ проектэу «Псауныгъ» зыфиIорэми тигугъапIэхэр етэпхых. Ау сыд фэдэ Iэмэ-псымэ дэгъуи цIыфыгъэмрэ гукIэгъумрэ апэ ишъынхэ алъэкIыщтэп. МыщкIэ IэпыIэгъушхо къышъуфэхъух волонтерхэр. Ахэм опытэу яIэ хъурэр тапэкIи агъэфедэжьын амал яIэщт. Мыщ фэдэ шIушIэ Iофтхьабзэхэм мэхьанэшхо яI, анахьэу сабыйхэмкIэ. КIэлэцIыкIухэм япсауныгъэ, янэгушIуагъэ анахь лъапIэу тиIэхэм ащыщ, — къыIуагъ КъумпIыл Мурат.

Iофтхьабзэм изэфэхьысыжьым волонтер движением хэхъоныгъэхэр ышIынхэмкIэ УФ-м и Президентэу Владимир Путиным къыгъэуцугъэ унашъохэм Адыгеим и ЛIышъхьэ ягугъу къышIыгъ. Мы лъэныкъом хэхъоныгъэхэр егъэшIыгъэнхэм мэхьанэшхо зэриIэр КъумпIыл Мурат игущыIэ къыщыхигъэщыгъ.
Гъонэжьыкъо Сэтэнай.

Сурэтхэр А. Гусевым тырихыгъэх.