КIэлэцIыкIухэм языгъэпсэфыгъо уахътэ зэрэзэхащэрэм зыщигъэгъозагъ

Урысые Федерацием и Федеральнэ ЗэIукIэ ФедерациемкIэ и Совет и Тхьаматэу Валентина Матвиенкэмрэ Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Муратрэ кIэлэцIыкIухэм япсауныгъэ зыщагъэпытэрэ лагерэу «Горный» зыфиIоу поселкэу Каменномостскэм дэтым щыIагъэх. ЯтIонэрэ чэзыум мыщ зыщызгъэпсэфыщт кIэлэцIыкIухэр къэкIуагъэх.

Илъэс къэс Адыгеим икIэлэеджэкIо мин 1,5-рэ фэдиз мы лагерым зыщагъэпсэфынэу къэкIох. Ащ нэмыкIэу, хабзэ зэрэхъугъэу, Ханты-Мансийскэ АО-м щыщ кIэлэцIыкIухэри мыщ къэкIох. Мы илъэсым шъэожъые ыкIи пшъэшъэжъые 380-м ехъу лагерым щыIэгъах, джыри нэбгырэ 400 фэдиз загъэпсэфынэу къэкIуагъэх. Ахэм апае ищыкIагъэхэр зэкIэ мыщ щыIэх: зыщыпсэущтхэ зэтегъэпсыхьэгъэ унэхэр, культурэм епхыгъэ программэ игъэкIотыгъэхэр ыкIи нэмыкIхэр. Гъогогъуитфэ кIэлэцIыкIухэр мыщ щагъашхэх.

ХьакIэхэм лагерыр къаплъыхьагъ, Iоф щызышIэхэрэм нэIуасэ афэхъугъэх.

«КIэлэцIыкIухэм языгъэпсэфыгъо уахътэ зэхэзыщэрэ цIыфхэр гуетыныгъэ ахэлъэу Iофым зэрекIуалIэхэрэр нэрылъэгъу. КIэлэцIыкIухэр чэфых. Сэ зэрэсшIошIырэмкIэ, илъэс псаум къыкIоцI кIэлэцIыкIухэм япсауныгъэ игъэпытэнкIэ мы чIыпIэр къызфэбгъэфедэми хъущт, сыда пIомэ жьым изакъоми Iэзэгъу мэхъу», — икIэухым къыIуагъ Валентина Матвиенкэм.

Адыгэ Республикэм и ЛIышъхьэ ипресс-къулыкъу